काठमाडौं, पुस २५
वन तथा वातावरण मन्त्रालयका सहसचिव चन्द्रमान श्रेष्ठविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले अकुत सम्पति आर्जन गरेका भन्दै श्रेष्ठविरुद्ध आज विशेष अदालतमा मुद्दा दायर गरेको हो ।
भ्रष्टाचार गरी जम्मा बनाएको सम्पति श्रीमती जमुना तण्डुकार र नवलपरासी स्वाठी निवासी भगवती योगीको नाममा समेत राखेको पाइएपछि उनीहरुलाई समेत प्रतिवादी बनाएर आयोगले मुद्दा दायर गरेको छ ।
श्रेष्ठले पदको दुरुपयोग गर्दै गैरकानूनी रुपमा सम्पत्ति आर्जन गरेको प्रारम्भिक अनुसन्धानबाटै खुलेपछि मुद्दा दायर गरिएको अख्तियारका सहप्रवक्ता मदन कोइरालाले जानकारी दिनुभयो । अख्तियारका अनुसार श्रेष्ठले आर्जन गरेको सम्पत्तिमध्ये १ करोड ३४ लाख रुपैयाँको स्रोत खुल्न नसकेपछि उनीमाथि मुद्दा दायर गरिएको हो ।
सार्वजनिक पद धारण गरेको मितिदेखि अहिलेसम्म श्रेष्ठले आर्जन गरेको ३ करोड ४४ लाख ७७ हजार मध्ये २ करोड १० लाख ७७ हजार रुपैयाँको मात्रै स्रोत खुलेकाले बाँकी भ्रष्टाचार गरेर आर्जन गरेको पाइएको अख्तियारले दायर गरेको रिटमा उल्लेख छ।
लामो समय मालपोत र यातायात कार्यालयमा काम गरेका श्रेष्ठमाथि यातायात व्यवस्था विभागको महानिर्देशक हुँदादेखि आयोगले छानबिन सुरु गरेको थियो ।
भ्रष्टाचार गरी जम्मा बनाएको सम्पति श्रीमती जमुना तण्डुकार र नवलपरासी स्वाठी निवासी भगवती योगीको नाममा समेत राखेको पाइएपछि उनीहरुलाई समेत प्रतिवादी बनाएर आयोगले मुद्दा दायर गरेको छ ।
