काठमाडौं, ३ मंसिर । विभिन्न मन्त्रालयले चालू आर्थिक वर्ष २०७५/०७६ का लागि विनियोजित बजेटको ठेक्का नै नलगाई बजेटभन्दा बाहिरबाट ४४ अर्ब रुपैयाँभन्दा बढी थप बजेट माग गर्दै अर्थ मन्त्रालयमा पत्राचार गरेका छन् ।
चालू आर्थिक वर्षमा देश वित्तीय संघीयतामा गएर काम गर्न अन्योल सिर्जना भएको बहानाबाजी गरी मन्त्रालयहरुले ठेक्कापट्टासम्बन्धी काम नै नगरी/नगराई नयाँ–नयाँ शीर्षकमा बजेट माग गरेका छन् । यसले चालू आर्थिक वर्षमा बजेट दुरुपयोग अझै बढ्ने स्पष्ट संकेत गरेको छ ।
अर्थ मन्त्रालयले संघीय संसद्को अर्थ समितिमा पठाएको विवरणअनुसार विनियोजित बजेटबाट काम नै नगरी विभिन्न मन्त्रालयहरुले थप बजेट माग गरेका हुन् ।
अर्थ मन्त्रालय स्रोतका अनुसार चालू आवको पुँजीगततर्फको बजेटको काम नै नथाली भौतिक पूर्वाधार तथा यातायात मन्त्रालयले चार अर्ब ४८ करोड रुपैयाँ माग गर्दै अर्थमा पत्राचार गरेको छ ।








































