काठमाडौं, कात्तिक २६
नेपाली कांग्रेसभित्र पछिल्लो समय उपसभापति मनोनयन प्रक्रियामा असन्तुष्ट नेताहरु एक जुट हुन थालेका छन् । सभापति शेरबहादुर देउवाको कार्यशैली विरुद्ध बैठक र सार्वजनिक कार्यक्रममा वक्तव्यबाजी गरिरहेका नेताहरु लञ्चमिटिङमा बसेका छन् ।
कांग्रेस नेतृ सुजता कोइरालाको निवास मण्डिखाटारमा आज विहान भएको छलफलमा आसन्न महासमिति बैठकमा कसरी सामुहिक एजेण्डा लैजाने भन्ने बारेमा छलफल भएको छ । कुनै ठोस निर्णय नभएपनि देउवाको कार्यशैलीको विरोध गर्ने सहमति भने भएको नेताहरुले जानकारी दिएका छन् । यद्यपी केही नेताहरुले भने संस्थापन पक्ष विरुद्ध आगामी महाधिवेशनमा नयाँ नेतृत्वलाई उठाउने गरी अहिलेबाट बृहत्त छलफल गरेर अघि बढ्ने योजनाको शुरुवात भएको बताएका छन् ।
छिटो महासमिति बैठक राख्नुपर्ने बताउँदै आएको पौडेल पक्षले मंसिर २८ देखि पुस ३ गतेसम्म काठमाडौं हुने महासमिति बैठकमा कसरी प्रस्तुत हुने, विचाराधीन विधानबारे कस्तो अडान राख्ने भन्ने विषयमा छलफल भइरहेको एक नेताले जानकारी दिनुभयो । यसअघि पौडेल निवासमा भएको भेलामा सहभागी नभएका महामन्त्री शशांक कोइराला मंगलबारको भेलामा सहभागी हुनु भएको छ । उहासँगै बैठकमा प्रकाशमान सिंह, अर्जुननरसिंह केसी, शेखर कोइराला, रामशरण महत पनि सहभागी हुनु भएको थियो । यो भेलालाई कांग्रेसभित्र निक्कै महत्वका साथ हेरिएको छ ।
