काठमाण्डौं, श्रावण, २० । प्रमुख प्रतिपक्ष दल नेपाली काँग्रेसले सत्तारुढ नेपाल कम्युनिष्ट पार्टी (नेकपा) ले विनाकारण प्रस्तावित प्रधानन्यायाधिश दीपकराज जोशीलाई अस्विकृत गर्ने निर्णय लिएको आरोप लगाएको छ ।
काँग्रेस नेता एवम् संसदीय सुनुवाई विशेष समितिका सदस्य भिमसेनदास प्रधानले विना कारण जोशीलाई प्रधानन्यायाधिश बन्न नदिएको भन्दै सत्तारुढ नेपाल कम्युनिष्ट पार्टी (नेकपा)प्रति आक्रोश व्यक्त गर्नु भएको हो । उहाँले अव संघीय कानुन नबनाई प्रधानन्यायाधिशको सुनुवाई नगर्ने अडान पनि राख्नु भयो । संघीय कानुन विनानै जोशीको सुनुवाई गर्दा आफूहरु फसेको उहाँको तर्क थियो ।
आईतबार काठमाडौंमा आयोजित साक्षात्कार कार्यक्रममा बोल्दै नेता प्रधानले प्रधानमन्त्री, विपक्ष दलका नेता, प्रतिनिधिसभाका सभामुखसहित सर्वोच्च पदाधिकारीहरुले गरेको निर्णय अस्विकृत गर्ने अधिकार संसदीय सुनुवाई विशेष समितिलाई नरहेको तर्क पनि गर्नु भयो ।
काँग्रेस नेता दासले जोशीको सुनुवाई चित्त नबुझेको कारण अस्विकृत गर्नु परेको भन्ने सत्तारुढ नेपाल कम्युनिष्ट पार्टी (नेकपा) का नेताहरुको तर्कको कुनै अर्थ नरहेको दावी पनि गर्नु भयो ।
