चलचित्र प्रिमियरका लागि मुम्बई पुगेको ‘प्रेम गीत ३’ टिम नेपाल फर्किएको छ ।
शुकवारदेखि ‘वर्ल्डवाइड’ प्रदर्शनमा आएको चलचित्रको प्रिमियरका लागि अभिनेता प्रदीप खड्का, अभिनेत्री क्रिष्टिना गुरुङ, निर्माता एवं निर्देशक सन्तोष सेन लगायतको टिम गतसाता मुम्बई पुगेको थियो ।
निर्माण टिमले शनिवार मुम्बईबाट नेपालगञ्ज पुगेर दर्शकको प्रतिक्रिया लिएको छ ।
नेपालगञ्जमा दर्शकको प्रतिक्रिया लिएपश्चात निर्माण टिम शनिवार राति नै काठमाडौं फर्किएको हो ।
अब, निर्माण टिम नेपालका हलहरूमा पुगेर दर्शक प्रतिक्रिया लिनेछ ।
चलचित्र हेर्न हलमा दर्शकहरूको उत्साहजनक उपस्थिति देखिएको छ ।
शुक्रवार र शनिवार चलचित्रले नेपालमा देशभरका अधिकांश हलमा हाउसफुल दर्शकहरूको साथमा प्रदर्शन भएको वितरकहरूले बताएका छन् ।
छेतेन गुरुङ र सन्तोष सेनको संयुक्त निर्देशन रहेको चलचित्रमा प्रदीप खड्का, क्रिष्टिना गुरुङ, शिव श्रेष्ठ, सुनिल थापा, अनुभव रेग्मी, मनिष राउत लगायतका कलाकारहरूको अभिनय छ ।








































