२९ भदौ, काठमाडौं । इटालियन क्लब एसी मिलानका स्ट्राइकर ज्लाटन इब्राहिमोभिचले आफूले अहिले सन्यास नलिने बताएका छन् । चोटसँग संघर्ष गर्दै आएका इब्राहिमोभिचले आफूले तत्काल सन्यास नलिने बताएका छन् ।
इब्राहिमोभिचले गत मेमा घुँडाको शल्यक्रिया गराएका थिए । जसले गर्दा उनी अहिले मैदान बाहिर छन् । इटालियन अनलाइन ला गजेट्टा डेलो स्पोर्ट्ससँगको कुराकानीमा उनले सन्यास नलिने बताएका छन् ।
‘म छिटै फर्किने छु । म सन्यास लिने छैन, म फिर्ता आउँदैछु, र म हार मान्ने छैन,’ इब्राहिमोभिचले भनेका छन् ।
गत सिजन एसी मिलानबाट इटालियन सिरी एको उपाधि जितेपछि उनले घुँडाको शल्यक्रिया गरेका थिए । चोटका बावजुत पनि मिलानले इब्राहिमोभिचसँग एक वर्षको सम्झौता नवीकरण गरेको थियो । उनी कहिले मैदान फर्कने एकिन नभएपनि आगामी वर्ष जनवरीमा खेलमा फर्कने सम्भावना छ ।








































