काठमाडौँ — बाँकी रहेको कोरोना बिमा भुक्तानीका लागि सरकारले १ अर्ब रुपैयाँ निकासा दिने निर्णय गरेको छ । गत साता बसेको मन्त्रीपरिषद्को बैठकले कोरोना बिमामा सरकारले तिर्नुपर्ने दायित्वमध्ये १ करोड रुपैयाँ निकासा दिने निर्णय भएको अर्थ मन्त्रालयका प्रवक्ता आनन्द काफ्लेले बताए ।
‘मन्त्रिपरिषद्ले एक अर्ब रुपैयाँ निकासा दिने निर्णय गरेको छ,’ उनले भने, ‘अर्थ मन्त्रालयले बिमा समितिलाई निकासा दिने प्रक्रिया सुरु भएको छ । पैसा पाएपछि बिमा समितिले कोरोना बिमा कार्यविधि अन्तर्गत बिमितलाई रकम व्यवस्थापनको निर्णय गर्नेछ ।’ सरकारले आफूले तिर्नुपर्ने रकम नदिएको भन्दै ०७७ चैत देखि बिमा कम्पनीले कोरोना बिमाको भुक्तानी रोकेका छन् । बिमा समितिका अनुसार अहिले कोरोना बिमाबापत कम्पनीहरूले १० अर्ब ५२ करोड ३२ लाख ९० हजार रुपैयाँ भुक्तानी गर्न बाँकी छ ।
संख्याका आधारमा हेर्दा अहिले करिब १ लाख ११ हजार ९ सय बिमितले भुक्तानी पाउन बाँकी छ । बिमा समितिले कम्पनीहरूले १० अर्ब ५२ करोड ३२ लाख ९० हजार रुपैयाँ भुक्तानी गर्न बाँकी रहेको बताउँदै आएका छन् । भुक्तानी गर्न बाँकी रहेकोमध्ये सरकारको दायित्वअन्तर्गत भने करिब साढे ११ अर्ब रुपैयाँ छ ।







































