गोरखाको बारपाक सुलिकोट गाउँपालिकाको प्रशासकीय भवन निर्माण सम्पन्न भएर नसर्दै भत्किन थालेको छ ।
निर्माण सम्पन्न भएको भन्दै पालिकाले लाखौँ रुपैँया खर्च गरेर तामझामका साथ उद्घाटन गरे पनि नसर्दै भवन भत्किन थालेको हो ।
गत चैत १२ गते शनिबार निर्माण सम्पन्न भएको भन्दै गाउँपालिकाले नेकपा माओवादी केन्द्रका अध्यक्ष पुष्पकमल दाहाल प्रचण्डलाई प्रमुख अतिथिको रुपमा बोलाएर तामझामका साथ भवन उद्घाटन गरेको थियो ।
गण्डकी प्रदेश सरकार, जिल्ला समन्वय समिति र बारपाक सुलिकोट गाउँपालिकाको साझेदारीमा पाँच करोड १० लाख रुपैयाँको लागतमा भवन निर्माण भएको हो ।
पालिकाले करोडौँ रुपैँया लागतमा निर्माण गरेको भवनमा सरेर कार्य सम्पादन सुरु गरिसकेको छैन् । तर, पालिकाको भवनको दोस्रो तल्लामा चर्किएर पानी छिर्न थालेको छ । छिरेको पानीले भवन भित्रको कोठा तालिएको छ । चर्र्किएको ठाउँबाट अत्याधिक पानी छिर्न थालेपछि गाउँपालिकाले भित्रबाट पलाष्टिक र वाहिरबाट हरियो ृकपडाले ओत दिएको छ । यस्तै पिल्लर र ढलान पनि चर्किन थालेको छ । भुँई तला दबिन थालेको छ ।
टाढाबाट हेर्दा मात्रै चिटिक्क हो । भित्र पानी बसेर कोठा भित्रै ताल छ । भुँई तला पनि केही ईन्च दबिएको छ । पिल्लर र भित्ताहरु पनि चर्किन सुरु भईसक्यो । कमिसन नखाई, भ्रष्ट्रचार नगरी, गुणस्तरीय काम गरेको भए बनिसकेको केही महिना नपुग्दै यस्तो हुन्थ्योे र ?’, नाम नबताउने सर्तमा पालिकाका एक प्रतिनिधीले भने ।
प्रशासकीय भवनका लागि करोडौँ रुपैँया खर्च गरे पनि हालसम्म गाउँपालिकाले भाडाको घरबाट सेवा दिईरहेको छ । करोडौँको लागतमा भवन निर्माण गरेपनि प्रयोग गर्न नपाएपछि गाउँपालिकाको लगानी ‘बालुवामा पानी’ जस्तै भएको छ ।
कर्मचारीहरु ज्यान जोखिममा राखेर जीर्ण भवनमा सरेर सेवा दिन नसकिने बताउँछन् । भवन निर्माणका लागि नवकान्तिपुर कन्स्ट्रक्सन कम्पनी प्रालिले जिम्मा लिएको थियो








































