काठमाडौँ, बिहिबार, ३ चैत्र २०७८ । काठमाण्डौमा ट्राफिक नियम मिच्ने झन्डै पाँच सय वटा सवारी साधनलाई ट्राफिक प्रहरीले होल्ड गरेको छ ।
आज बिहीवार फागु पूर्णिमा अर्थात् होली खेल्ने नाममा तीव्र गतिमा चलाएका, जाँड–रक्सी खाएर गाडी चलाएका र कागजात नभएका चार सय ९९ यातायातका साधनलाई ट्राफिक प्रहरीले होल्ड गरेको हो ।
अहिले बेलुका साढे ४ बजेसम्म चार सय ९९ यातायातका साधन होल्ड गरिनुका साथै जाँड–रक्सी खाएर होहल्ला गर्ने ४२ जनालाई पक्राउ गरिएको हो ।
होल्ड गरिएको यातायातमध्ये सबैभन्दा धेरै मोटरसाइकल र स्कुटर छन् । होल्डमा राखिएको गाडीलाई बेलुका छोडिने ट्राफिक प्रहरीले जनाएको छ ।
होल्डमा राखिएका यातायात धनी र पक्राउ परेकालाई सम्झाइ बुझाइ गरेर बेलुका साढे ७ बजेपछि छोडिने महानगरीय प्रहरी प्रमुख प्रहरी अतिरिक्त महानिरीक्षक हरिबहादुर पालले जानकारी दिनुभयो ।








































