पोखरा : पर्यटकीय सहर पोखराको फेवाताल किनारमा पर्यटकलाई लक्षित गरी फागु पूर्णिमा मनाइने भएको छ । पर्यटकलाई फागुपूर्णिमा र यसको महत्व बारेमा जानकारी दिँदै फागु पर्व मनाउन होली उत्सवको अयोजना गरिएको हो । होली उत्सव पर्यटकलाई नेपालको संस्कृतिक विविधता र फागुपूर्णिमाको बारेमा जानकारी गराउने र अबीर उपलब्ध गराएर सुरु हुनेछ । उत्सवमा सहभागी पर्यटकसँगै पर्यटन व्यवसायीले एक आपसमा अबीर दलेर होली उत्सव मनाइने आयोजक रेष्टुरेण्ट एण्ड वार एशोसियसन अफ नेपाल (रेवान) पोखराका अध्यक्ष लक्ष्मण बरालले बताए ।
पञ्चेबाजा बजाएर नाचगान गर्दै फेवाताल किनारको तीन किलो मिटर क्षेत्रमा उत्सवको रुपमा होली मनाइने रेवान पोखराका उपाध्यक्ष नरेश भट्टराईले बताए । गत वर्ष कोरोना संक्रमणका कारण होली उत्सव रोकीएको थियो । कोरोना संक्रमण कम्जोर भएको र सरकारले पनि मेला महोत्सव आयोजना गर्न दिएकोले यस वर्ष होली उत्सव मनाउन लागिएको उपाध्यक्ष भट्राईले बताए ।
उत्सवले पोखरामा रहेका पर्यटकलाई नेपाली संस्कृतिको बारेमा जानकारी हुने र मनोरञ्जन पनि मिल्ने भएकाले सबै पर्यटन व्यवसायीको पनि सहभागीत रहने पोखरा पर्यटन परिषदका अध्यक्ष गोपीबहादुर भट्टराईले बताए । तेस्रो लहरको कोरोना संक्रमण घटेसँगै आन्तरिक, भारतीय र तेस्रो मुलुकका पर्यटक पनि आउने क्रम सुरु भएको छ । यसैले पनि पर्यटकका लागि महोत्सव महत्वपूर्ण रहने आयोजकको विश्वास छ ।








































