काठमाडौं । आर्सनलले लेस्टर सिटीलाई २–० ले पराजित गर्दै इङ्लिस प्रिमियर लिगको चौथो स्थानमा उक्लिएको छ । लगातार पाँच खेलमा विजय हासिल गरेसँगै आसर्नलको शीर्ष चारमा रहने सम्भावना बलियो बनेको छ ।
घरेलु टोली आर्सनलले आइतबार राति भएको खेलको ११औं मिनेटमा थोमस पार्टेको गोलबाट अग्रता लिएको थियो । पार्टेले गाब्रियल मार्टिनेलीको क्रसलाई हेडमार्फत पोष्टको दिशा दिएका थिए । एलेक्जेन्डर लाकाजेटले ५९औं मिनेटमा पेनाल्टीमा गोल गर्दै आर्सनलको अग्रता दोब्बर बनाएका थिए ।
जितसँगै आर्सनलले २६ खेलबाट ५१ अंक जोडेको छ । जुन तेस्रो स्थानको चेल्सीभन्दा आठ अंकले पछाडि हो । चेल्सीले एक खेल बढी खेलेको छ । त्यस्तै पाँचौं स्थानको म्यानचेस्टर युनाइटेडभन्दा आर्सनलले एक अंकले अगाडि छ । तर, युनाइटेडभन्दा आर्सनलले तीन खेल कम खेलेको छ ।
‘‘हाम्रो टिमलाई आफ्नो क्षमतामाथि बलियो विश्वास छ । हामी उच्च मनोबलका साथ खेलेका छौं,’’ आर्सनलका मिडफिल्डर मार्टिन ओडेगार्डले भने, ‘‘यो यात्रालाई हामीले जारी राख्नुपर्छ ।’’









































