काठमाडौं, कांग्रेसका युवा नेता तथा उद्यमी राजेन्द्र बजगाइँले कांग्रेसका आगामी महाधिवेशनमा केन्द्रीय सदस्यमा उमेदवारी घोषणा गरेका छन् ।
उनले ‘विकासका निम्ति राजनीति’ भन्ने नारा अघि सार्दै केन्द्रीय सदस्यमा उमेदवारी घोषणा गरेका हुन ।
उनी करिब तीन दशकदेखि पर्यटन क्षेत्रमा क्रियाशील छन् । उनले १३ औं महाधिवेशनमा पनि उमेदवारी घोषणा गरेका थिए ।
त्यसबेला कुनै प्यानलमा नरहेका बजगाइँ अहिले सभापति शेरबहादुर देउवाइतरको प्यानलमार्फत उमेदवारीको तयारीमा छन् ।
महाधिवेशन प्रतिनिधिमा लगातार तीनपटक गोरखाबाट प्रतिनिधित्व गरेका बजगाइँलवे २०७४ सालको प्रदेशसभा निर्वाचनमा पनि गोरखा १(२) बाट उमेदवारी दिएका थिए ।
निर्वाचनमा पराजित भए पनि आफू लगातार कांग्रेसको राजनीतिमा सक्रिय रहेको बताए ।
उनले पार्टीमा सभापति बलियो हुनुपर्ने तर्क अघि सारेका छन् । “सभापतिलाई कमजोर बनाउँदा पार्टी पनि कमजोर हुने अवस्था आउन सक्छ,” उनले भने, “त्यसैले विधान परिवर्तन गरेर भए पनि पार्टीमा सभापति बलियो हुनुपर्छ । तर सभापतिले गुट चलाउन हुँदैन । काखा र पाखा गर्न हुँदैन ।”
उनले पार्टीमा शक्ति सन्तुलन खलबलिने डर रहेको पनि बताए ।
“पार्टीमा शक्तिसन्तुलन खलबलिने डर हुन थालेको छ र यसको रोकथाम हुनेगरी विभागलाई बलियो बनाउनुपर्छ,” उनले भने ।
उनले विद्यालयमा राजनीतिको हद तोकिनुपर्ने, युवा वर्गलाई देशभित्रै रहने अवसर प्रत्याभूति हुनुपर्नेलगायतका एजेन्डा अघि सारेका छन् ।








































