काठमाडौँ, ५ कात्तिक २०७८ । विश्वमा दुर्लभ मानिएको हिउँचितुवाको संरक्षणमा नेपालले गरेको प्रयासको अन्तर्राष्ट्रिय समुदायमा सरहाना भएको छ ।
हिउँचितुवा पाइने विश्वका १२ वटा मुलुकको भर्चुअल बैठकमा नेपालले गरेको प्रयासको सराहना भएको हो । नेपालले अध्यक्षता गरेको छैटौँ स्टेयरिङ कमिटीको बैठकमा नेपालले ताप्लेजुङमा हिउँ चितुवाको अध्ययन अनुसन्धान केन्द्रको स्थापना गरेको जानकारी दिएको छ ।
नेपालले आगामी दिनमा हिउँचितुवाको सङ्ख्या यकिन गर्नका लागि सर्वेक्षण गर्ने जानकारी पनि सो अवसरमा दिइएको छ । नेपालले विश्वमा नै पहिलो पटक जलवायुमैत्री पूर्वी हिमाली भूपरिधि संरक्षण तथा व्यवस्थापन योजना तर्जुमा गरेको बैठकमा जानकारी दिइयो ।
हिउँचितुवा संरक्षणमा निजी क्षेत्रलाई पनि सहभागिताको प्रयास भइरहेको बताइएको छ । बैठकमा वन तथा वातारणमन्त्री रामसहायप्रसाद यादव, सचिव डा. पेमनारायण कँडेलले भाग लिनुभएको थियो ।








































