काठमाडौं, २ भाद्र २०७८ । जनता समाजवादी पार्टीका संघीय परिषद अध्यक्ष एवं पूर्वप्रधानमन्त्री डा. बाबुराम भट्टराईले सरकारले ल्याएको राजनीतिक दल विभाजनसम्बन्धी अध्यादेशको विरोध गरेका छन् ।
मंगलबार राति सामाजिक सञ्जालमार्फत भट्टराईले अहिलेको सरकारले संसद अधिवेशन अन्त्य गरेर अध्यादेश ल्याउनु भनेको केपी शर्मा ओली प्रवृत्तिकै निरन्तरता भएकाे बताएका हुन् । ‘ओली गएपनि ओली प्रवृत्ति कायम रहनु लोकतन्त्रको निम्ति चिन्ताको विषय हो। जसले गरेपनि संसदअधिवेशन अन्त्यगरे लगत्तै अध्यादेश ल्याउनु लोकतन्त्रको उपहास हो।’ भट्टराईले भनेका छन् ।
त्यस्तै, डा. भट्टराईले सांसद पद जोगाउने गरी अध्यादेश ल्याउनु भनेको त झनै प्रतिनिधिमूलक लोकतन्त्रको हत्या नै गर्नुसरह भएको बताएका छन् । गलतलाई गलत भन्न सक्नुपर्ने उनको भनाइ थियो । उनले भनेका छन् -‘अनि सांसद पद जोगाउने गरी दल विभाजन गर्ने अध्यादेश ल्याउनु प्रतिनिधिमूलक लोकतन्त्रकै हत्या हो । गलतलाई गलत भन्दा गठबन्धनको विरोध नठानियोस !’









































