काठमाडौँ, बिहिबार, २५ मङ्सिर २०७७ । आज ७२ औँ अन्तराष्ट्रिय मानव अधिकार दिवस (१० डिसेम्बर) का अवसरमा नेता रामचन्द्र पौडेल सबैमा शुभकामना व्यक्त गर्नु भएको छ ।
बिज्ञप्ति
सन् १९४८ डिसेम्बर १० का दिन संयुक्त राष्ट्रसंघ महासभाले मानव अधिकारको विश्वव्यापी घोषणापत्र जारी गरेको थियो । भय र अभावबाट मुक्तिको उपभोग गर्न पाउने विश्वको सिर्जनाका लागि प्रतिपादित मानव अधिकारको विश्वव्यापी घोषणापत्रमा निहित अधिकारहरुको संरक्षण र प्रवद्र्धन अत्यन्त आवश्यक छ ।
मानव अधिकारको विश्व्यापी घोषणापत्रले नागरिक तथा राजनीतिक अधिकारका साथसाथै आर्थिक, सामाजिक र सांस्कृतिक अधिकारको संरक्षणका लागि लिपिवद्ध गरेका धाराहरुमा आधारित रही संयुक्त राष्ट्रसंघको पहलमा दर्जनौ प्रतिज्ञापत्र/महासन्धिहरु जारी भइसकेका छन् जुन अन्तराष्ट्रिय मानव अधिकार कानुनको रुपमा पनि चिनिन्छन् ।
२०१७ सालमा नेपाली नागरिकको राजनीतिक स्वतन्त्रताको अपहरण पश्चात मानव अधिकार दिवस मनाउँदा समेत अनेकौ कठिनाइको सामना गर्नुपर्थ्यो । आज नेपालमा त्यो स्थिति नभएता पनि सत्ताको स्वेच्छाचारी एवं सर्वसत्तावादी चरित्रका कारण अनेकौ प्रश्न खडा हुन थालेको छ । एकातिर झण्डै दुई तिहाइको नेकपाको सरकारले मानव अधिकारको विश्वव्यापी घोषणापत्रद्वारा निर्दिष्ट नागरिकको राजनीतिक स्वतन्त्रतालाई कुण्ठित गर्ने गरी केही विधेयकहरु अघि सारेको छ त अर्कोतिर नेकपाको कुशासनका कारण नागरिकका आर्थिक सामाजिक अधिकारहरु ओझेलमा पर्न थालेका छन् ।
एकातिर कुशासन र अव्यवस्थाका कारण नागरिकहरुमा आक्रोश बढ्न थालेको देखिन्छ अर्कोतिर इतिहासले विदा गरिसकेका असान्दर्भिक एवं प्रतिगामी मान्यता र चरित्रहरुले टाउको उठाउन थालेका छन् जसका कारण नागरिकले ठूलो त्याग र संघर्ष पश्चात हासिल गरेको उपलब्धीहरुमाथि ग्रहण लाग्न थालेको हो कि भन्ने चिन्ताले सताउन थालेको छ ।
यो परिस्थितिमा नेपाली नागरिकको अधिकारको रक्षाका लागि वर्तमान सर्वसत्तावादी चरित्र विरुद्ध शान्तिपूर्ण तवरले दृढताका साथ उभिनु र प्रतिगमनको कुनै पनि संभावनालाई निस्तेज पार्ने दोहोरो दायित्व सबै लोकतन्त्र र अधिकारवादीहरुमा आएको छ । यो अवस्थामा विगततर्फ फर्कने होइन, लोकतन्त्र, मानव अधिकार र स्वतन्त्रता सुदृढ र सुनिश्चित गर्दै भविष्यको यात्रा तय गर्नुपर्छ र यसका लागि सबै लोकतन्त्र, शान्ति र अधिकारवादीहरुलाई सहकार्य गर्न म आह्वान गर्दछु ।
नेपाली नागरिकको मानव अधिकार रक्षाका लागि म र मेरो पार्टी नेपाली कांग्रेस हिजो पनि प्रतिवद्ध थियो, आज पनि छ र मेरो सारा उर्जा नागरिकको मानव अधिकार र आधारभूत स्वतन्त्रताको संरक्षणमा सदैव खपत हुने विश्वास पनि दिलाउन चाहान्छु ।
रामचन्द्र पौडेल
काठमाडौँ ,
२५ मङ्सिर २०७७










































