काठमाडौँ, शनिबार, १५ कात्तिक २०७७ । ट्राफिक प्रहरीद्वारा अभियानकै रूपमा गुर्जो रोप्ने काम सम्पन्न गरेको छ ।
महानगरीय ट्राफिक प्रहरी महाशाखाले काठमाडौँ उपत्यकास्थित ४४ वटै ट्राफिक कार्यालयसहित कोटेश्वरस्थित तीनकुनेको खाली जग्गामा आज गुर्जोको बिरूवा रोपेको हो ।
काठमाडौँको तीनकुनेमा एक हजार पाच सय र ट्राफिक कार्यालयमा पाँच÷पाँचवटा गुर्जोको बिरूवा रोपिएको हो । कोरोना भाइरस (कोभिड–१९) को रोकथाम र उपचारका लागि गुर्जो उपयोगी मानिन्छ ।
महाशाखाका प्रमुख प्रहरी वरिष्ठ उपरीक्षक भीमप्रसाद ढकाल, प्रहरी उपरीक्षक एवं महाशाखाका प्रवक्ता रामेश्वरप्रसाद यादव र प्रहरी कर्मचारीको सहभागितामा गुर्जोको बिरूवा रोपिएको हो ।
प्रमुख ढकालले अग्रमोर्चामा रहेर काम गर्ने प्रहरीलाई स्वास्थ्य जोखिम बढी भएकाले सचेतना र रोकथामका उपायमा ध्यान दिइएको बताउनु भयो ।








































