काठमाडौँ, १४ कात्तिक २०७७ । देशभर न्यूनतम तापक्रम घटेसँगै चिसो बढ्दै गएको छ ।
काठमाण्डौको आज बिहानको तापक्रम यो वर्षकै कम ११ डिग्री सेल्सियस मापन गरिएको मौसम पूर्वानुमान महाशाखाले जनाएको छ । महाशाखाका अनुसार हिजो र अस्ति काठमाण्डौको न्यूनतम तापक्रम ११ दशमलव ४ डिग्री सेल्सियस थियो । न्यूनतम तापक्रम घटेर बिहान बेलुकी चिसो बढे पनि दिउँसो भने गर्मी नै छ ।
देशका मुख्य सहरमध्ये दिपायलमा ३०.५ अधिकतम तापक्रम र ११ डिग्री न्यूनतम तापक्रम कायम थियो । त्यस्तै, डडेल्धुरामा अधिकतम २१.८ र न्यूनतम तापक्रम १०.१, धनगढीमा ३२ अधिकतम र १४ डिग्री न्यूनतम तापक्रम, वीरेन्द्रनगरका २९.३ अधिकतम, ११.७ न्यूनतम र नेपालगञ्जमा ३२.५ अधिकतम र १५.५ न्यूनतम तापक्रम थियो ।
जुम्लामा देशभरमै सबैभन्दा कम तापक्रम रेकर्ड भएको छ । जसअनुसार २२ डिग्री अधिकतम र ०.५ डिग्री न्यूनतम तापक्रम पुगेको थियो । त्यस्तै, घोराहीमा २९.२ अधिकतम, १४ डिग्री न्यूनतम तापक्रम रह्यो । पोखरामा २८.५ अधिकतम र १३.६ न्यूनतम, भैरहवाको ३४.४ अधिकतम र १६.५ डिग्री न्यूनतम, सिमरामा अधिकतम ३३ र १७.४ न्यूनतम तापक्रम रहेको छ ।
ओखलढुङ्गामा २३.३ अधिकतम र १३.५ डिग्री न्यूनतम तापक्रम, विराटनगरमा ३३ अधिकतम र १९.२ न्यूनतम, जनकपुरमा ३३.५ अधिकतम र १३.२ न्यूनतम तापक्रम रेकर्ड भएको मौसम पूर्वानुमान महाशाखाले जनाएको छ ।
अबको केही दिन सुक्खा मौसम नै रहने र वर्षाको सम्भावना नरहेको मानन्धरले जानकारी दिनुभयो । पश्चिमी वायुको प्रभाव बढ्दै जाँदा जाडो महिना सुरु हुनुअघि देशभर हल्का वर्षा हुने सम्भावना छ ।
अधिकतम तापक्रम घट्दै गएपछि मात्रै दिउँसो पनि चिसो हुने मौसमविद् प्रतिभा मानन्धरको भनाइ छ । आज पहाडी क्षेत्रको मौसम आंशिक बदली भए पनि अरु ठाउँको मौसम सफा हुने उहाँले जानकारी दिनुभयो ।








































