काठमाडौँ, आइतबार, १८ असोज २०७७ । डा. केसीसँग वार्ताका लागि नेपाल चिकित्सक संघको ७२ घण्टे अल्टिमेटम दिएका छन् । आमरण अनसनमा रहेका डा. गोविन्द केसीसँग वार्ता टोली गठन गरी वार्ता गर्न नेपाल चिकित्सक संघले सरकारलाई ७२ घण्टे अल्टिमेटम दिएको छ ।
आज आइतबार एक विज्ञप्ती जारी गर्दै संघका महासचिव डा. बद्री रिजालले डा. के.सी.को स्वास्थ्य अवस्था गम्भिर मोडमा पुगेको र सौहार्दपूर्ण वातावरणमा वार्ता गरी समस्याको समाधान गर्न माग गरेका हुन् ।
सङ्घले अल्टिमेटम दिँदै सरकारले अटेरी गरेमा जस्तोसुकै कठोर कदम चाल्न बाध्य हुने चेतावनी पनि दिएको छ । यसबाट पर्न जाने गम्भीर परिस्थितिको जिम्मेवार सरकार नै हुने सङ्घले जनाएको छ ।
चिकित्सा शिक्षा र स्वास्थ्य क्षेत्रमा सुधारको माग गर्दै जुम्लाबाट १९औं सत्याग्रह सुरु गरेका डा. केसी हाल त्रिवि शिक्षण अस्पतालमै सत्याग्रह जारी राखेका छन् । डा. केसीको स्वास्थ्य थप समस्या आएपछि अक्सिजन दिन थालिएको बताइएको छ ।








































