काठमाडौं । नेपाल पत्रकार महासंघले कोरोना भाइरसले नेपाली सञ्चार क्षेत्रमा पारेको असरबारे नेपाली कांग्रेसको ‘कोरोना अनुगमन समिति’ सँग छलफल गरेको छ ।
कार्यक्रममा महासंघका अध्यक्ष गोविन्द आचार्यले कोरोना भाइरसका कारण दुई हजारभन्दा पत्रकारले रोजगारी गुमाउनुपरेको र सात सयभन्दा बढी सञ्चारमाध्यम बन्द भएको बताए । उनले कोरोना महामारीको कारण देखाउँदै नाफामा रहेका सञ्चार गृहले समेत पत्रकारलाई रोजगारबाट वञ्चित गर्ने, श्रम शोषण गरेको भन्दै त्यसविरुद्ध महासंघले कडा आन्दोलन गर्ने चेतावनी दिए ।
कांग्रेसका सह–महामन्त्री तथा ‘कोरोना अनुगमन समिति’ का संयोजक प्रकाश शरण महतले पत्रकारलाई पेसाबाट बञ्चित गरिएकोप्रति गम्भीर आपत्ति रहेको बताए । उनले पत्रकार जनताको पीर–मर्का उजागर गर्न तथा सरकारको अनियमितता सार्वजनिक गर्ने कार्यमा सदैव लागिरहेको हुँदा पत्रकारको समस्या समग्र देशको समस्या रहेको बताए ।
उनले पत्रकारको पेसागत सुनिश्चितताका लागि सरकार र सम्बन्धित सञ्चार गृहले गम्भीरतापूर्वक लिनपर्नेमा जोड दिए । महतले पत्रकार महासंघको साथमा कांग्रेस सधैं रहेको र रहिरहने विश्वास दिलाउँदै अहिलेको अवस्थामा महासंघले गरिरहेको कामको प्रशंसा गरे ।
महासंघका पूर्वसभापति हरिहर विरहीले लोकतन्त्रमा जननिर्वाचित सरकारको नेतृत्वबाटै पत्रकारलाई निरुत्साहित गर्ने काम भएको भन्दै दुःख व्यक्त गरे । उनले विस्थापित पत्रकार तथा सञ्चार गृहलाई संरक्षण गर्ने सरकारको कुनै चासो नदेखिएको बताए ।
समितिकै सदस्य कांग्रेसका केन्द्रीय सदस्य नेता एनपी साउदले अहिलेको परिस्थितिमा सबै बाँच्ने र सबैलाई बचाउने शैलीबाट काम गर्नुपर्नेमा जोड दिँदै कांग्रेस सधैं पत्रकारहरूको पक्षमा रहेको बताए । उनले कोरोना प्रभावित क्षेत्र तथा समुदायसँग साथ र सहयोगका लागि पार्टीले अनुगमन समिति स्थापाना गरेको बताए ।
कांग्रेसका केन्द्रीय सदस्य एवं ‘कोरोना अनुगमन समिति’ का सदस्य चन्द्र भण्डारीले कोरोना विपतको यस घडीमा पत्रकारलाई संरक्षण गर्नुपर्नेमा रोजगारीबाटै निष्कासन गर्नु अत्यन्तै अमानवीय घटना भएको बताए । उनले सञ्चारजगतले प्रतिपक्षकोभन्दा ठूलो भूमिका निर्वाह गरेको भन्दै सञ्चार क्षेत्रमा संकट आउनुले प्रजातन्त्रमै खतरा भएको बताए ।
महासंघका महासचिव रमेश विष्टले पत्रकारिता क्षेत्र बाहिरबाट हेर्दा आकर्षकको पेसाजस्तो देखिए पनि कोरोनाका कारण पेसामा गम्भीर संकट देखिएको बताए । उनले केही सञ्चार गृहले पत्रकारलाई पेसाबाट वञ्चित गरेको भन्दै पत्रकारको रोजीरोटीका लागि आन्दोलन गर्न बाध्य भएको बताए । उनले कोरोना भाइरस महामारीका अवस्थामा राज्यले पत्रकार तथा सञ्चार क्षेत्रको संरक्षणका लागि कुनै पहल नगरेको भन्दै दुःख व्यक्त गरे ।
नेपाल प्रेस युनियनका अध्यक्ष बद्री सिग्देलले पत्रकारका कारण सञ्चारमाध्यमका सञ्चालकहरू विगतमा ठूलो धनराशि जोड्न सफल भएको भन्दै कोरोनाको बहानामा पत्रकारलाई पेसाबाट निष्काशन गर्नु अत्यन्तै दुखद् रहेको बताए । उनले पत्रकारका समस्याप्रति सरकारले गम्भीर चासो दिई सञ्चार माध्यमलाई व्यवस्थित गर्ने उपयुक्त समय रहेको बताए ।








































