काठमाडौँ, २ साउन २०७७ । पछिल्लो २४ घण्टामा देशभरका विभिन्न स्थानका थप १ सय १ जनामा कोरोना भाइरसको संक्रमण देखिएको छ । योसँगै कुल सङ्क्रमितको संख्या १७ हजार ४ सय ४५ जना पुगेको स्वास्थ्य तथा जनसङ्ख्या मन्त्रालयले पुष्टि गरेको छ।
नियमित पत्रकार सम्मेलनमा मन्त्रालयका प्रवक्ता प्रा.डा जागेश्वर गौतमले देशभरका विभिन्न २७ प्रयोगशालामा गरिएको पछिल्लो २४ घण्टाको परीक्षणमा १ सय १ जनामा सङ्क्रमण भेटिएको बताए ।
त्यस्तै, २८५ जना निको भएर घर फर्केको जानकारी दिए। हाल नेपालका ५ हजार ८ सय ७१ जना मात्रै कोरोनाका सक्रिय संक्रमित रहेका छन्।
नेपालका ५ जिल्लाहरु भोजपुर, मनाङ्ग, मुस्ताङ्ग सङ्खुवासभा र हुम्लामा अहिले कोरोना संक्रमित छैनन् । त्यस्तै, महोत्तरी, रौतहट, कैलाली, र बाजुरा जिल्लामा ५ सय भन्दा बढी सङ्क्रमित रहेका छन्। हालसम्म नेपालमा ११ हजार ५ सय ३४ जना निको भएका छन् भने ४० जनाको मृत्यु भएको छ।








































