काठमाडौं, आइतबार, २८ असार २०७७ । अमेरिकी राष्ट्रपति डोनाल्ड ट्रम्पले कोरोना भाइरसको महामारी सुरु भएपछि पहिलोपटक सार्वजनिक स्थलमा जाँदा मास्क लगाएका छन् । शनिबार वाल्टर रीड सैन्य अस्पताल जाँदा ट्रम्पले मास्क लगाएका हुन् ।
महामारी सुरु भएसँगै मास्क लगाउन नीजि स्वास्थ्यकर्मीहरुले सुझाव दिएपनि मास्क लगाएका थिएनन् । तर, शनिबार सैन्य अस्पतालमा जाने क्रममा ह्वाइटहाउसबाट बाहिरिदाँ उनले कालो मास्क लगाएका थिए । उनले मास्क लगाउनु स्वास्थ्यको लागि राम्रो भएको पनि बताए ।
‘म कहिले पनि मास्कको विपक्षमा थिइनँ । मलाई लाग्छ मास्क लगाउनु राम्रो कुरा हो, तर यसको पनि समय र स्थान हुन्छ ।’ उनले भने । अस्पतालमा ट्रम्पले सैनिकहरुसँग भेटघाट गरेका थिए ।
अमेरिका कोरोनाबाट सबैभन्दा धेरै प्रभावित देश हो ।
वर्ल्डोमिटरका अनुसार अमेरिकामा ३३ लाख ५५ हजारभन्दा धेरै कोरोना संक्रमित फेला परेका छन् । कोरोना संक्रमणबाटै १ लाख ३७ हजार ४ सय ३ जनाको मृत्यु भएको छ । यो आइतबार बिहान ६ बजेसम्मको आँकडा हो ।








































