काठमाण्डौँ, १३ फागुन २०७६ । विगतको बर्षजस्तै ‘क्रिकेट खेलाडी संघ नेपाल’ (सिप्यान) ले यस बर्ष पनि ‘एनसिसिएस–सिप्यान क्रिकेट अवार्ड ‘आयोजना गर्ने भएको छ । आइतबार सिप्यानले प्रेस मिट आयोजना गरी राष्ट्रिय तथा अन्तराष्ट्रिय स्तरको क्रिकेट प्रतियोगीतामा उत्कृष्ट प्रदर्शन गर्ने खेलाडीहरुलाई आउँदो चैत्र २१ गते अवार्ड प्रदान गरीने जनाएको हो ।
सो पुरस्कार अन्तर्गत ‘एनसिसिएस–सिप्यान क्रिकेटर अफ द एयर, २०१९–२०’ पुरुष तथा महिला ले जनहि नगद १ लाख ३२ हजार रुपैया पाउनेछन् । त्यस्तै, ‘एनसिसिएस–सिप्यान मोमेन्ट अफ द एयर, २०१९–२०’ पुरुष तथा महिला जनहि ६६ हजार रुपैया पुरस्कार स्वरुप पाउनेछन् ।
पुरानो पुस्तालाई प्रतिनिधित्व गर्ने पुरानो क्रिकेट खेलाडीलाई खेल क्षेत्रमा पुर्याएको योगदानको लागी ‘एनसिसिएस–सिप्यान लाइफटाइम अचिभमेन्ट अवार्ड, २०१९–२०’ पनि दिइने भएको छ । उक्त अवार्ड जित्नलाई ६६ हजार पुरस्कार स्वरुप दिइनेछ ।
सिप्यानले पुरस्कारहरुको लागी योग्य ब्यक्ति छनौट गर्न प्राविधिक समिति गठन गरिने जनाएको छ । तोकिएको मापदण्डको आधारमा समितिको सिफारिस गरेका खेलाडीहरुलाई विभिन्न विधामा पुरस्कार प्रदान गरिने सिप्यानका अध्यक्ष मनिष राज पाण्डेले जानकारी दिए ।
‘एनसिसिएस–सिप्यान मोमेन्ट अफ द एयर, २०१९–२०’ पुरुष तथा महिला को लागी अनलाइन भोटिङको माध्ययमबाट भोट गर्न सकिनेछ ।
कार्यक्रमको मुख्य प्रायोजक एनसिसिएस ग्रुप रहेको छ भने मिडिया पार्टनरको रुपमा हिमालय टेलिभिजिन रहनेछ ।









































