काठमाडौं, २३ माघ २०७६ । सम्पत्ति शुद्धीकरकण विभागले बालुवाटारस्थित ललिता निवासको सरकारी जग्गा दुरुपयोग गरेको मुद्दा लागेका कांग्रेसका पूर्वमन्त्रीलगायतको सम्पत्ति छानबिन सुरु गरेको छ ।
बालुवाटारस्थित ललिता निवासको १ सय १२ रोपनी सरकारी जग्गा व्यक्तिको नाउँमा ल्याएको प्रकरणमा बुधवार अख्तियार दुरुपयोग अनुसन्धान आयोगले पूर्व मन्त्री विजयकुमार गच्छदारसहित १ सय ७५ जनाविरुद्ध विशेष अदालतमा भ्रष्टाचार मुद्दा दायर गरेको थियो ।
बिहीबारबाट सम्पत्ति शुद्धीकरण अनुसन्धान विभागले यो प्रकरणमा मुख्य भूमिका खेल्ने पूर्वमन्त्री, सचिव र ठूला व्यापारिक घरानाका सम्पत्ति छानबिन गर्न सुरु गरेको हो ।
अख्तियारले मुद्दा दायर गरेकाहरूको सूचीमा गच्छदारसहित भूमिसुधार मन्त्री डम्बर श्रेष्ठ र उनीपछिका मन्त्री चन्द्रदेव जोशी पनि छन् । त्यस्तै पूर्वसचिवत्रय दीप बस्न्यात, छवीराज पन्त र दिनेशहरि अधिकारीविरुद्ध पनि मुद्दा दायर गरिएको छ ।








































