काठमाण्डौ, १४ असोज २०७६ । केही दिनअघि अवरुद्ध काठमाडौँको नागढुंगादेखि धादिङको नौबिसे लगायतमा ओहोरदोहोर गर्ने सबै नाकाको अवस्था सामान्य रहेको ट्राफिक प्रहरीले जनाएको छ ।
काठमाण्डौबाट बाहिरिने र भित्रिने यात्रुलाई कुनै पनि किसिमको समस्या नभएको महानगरीय ट्राफिक प्रहरीका प्रवक्ता रविकुमार पौडेलले बताउनुभयो ।
घटस्थापनासँगै उपत्यकामा स्कूल र कलेज बन्द भएकाले चापको समस्या कम हुने प्रहरीले अनुमान गरेको छ । तर पनि मुख्य व्यापारिक क्षेत्र र चोकमा भने गाडीसँगै मानवीय चाप बढी भएकाले त्यसको व्यवस्थापनमा प्रहरी खटाइएको महाशाखाले जनाएको छ ।
उहाँका अनुसार अस्तव्यस्त नागढुङगा – नौबिसे सडकखण्डमा पनि जाम हटेकाले काठमाण्डौबाट बाहिरिने यात्रुको संख्या बढेको छ । गएको २४ घण्टामा काठमाण्डौ उपत्यकाबाट १६ हजार गाडीबाट १ लाख ५७ हजार यात्रु बाहिरिएका छन् भने १० हजार गाडीबाट ६० हजार यात्रु उपत्यका भित्रिएका छन् ।








































