काठमाडौं, १३ भाद्र २०७६ । नेपाली कांग्रेसका सांसद गगनकुमार थापासहित काठमाडौं क्षेत्र नम्बर ४ का स्थानीय जनताले सडक विभागको कार्यालय अगाडि धर्ना दिएका छन् ।
काठमाडौंको कपन र बुढानिलकण्ठ क्षेत्रका १२ वटा सडक समयमै नबनेपछि सांसद तथा कांग्रेस नेता गगन थापाको नेतृत्वमा शुक्रबार स्थानीयले सडक विभागको कार्यालय चाकुपाटमा धर्ना दिएका हुन् ।
काठमाडौं क्षेत्र नम्वर ४ अन्तर्गत कपन र बुढानीलकण्ठ क्षेत्रमा १२ वटा सडकको ठेक्का लिएको शैलुङ कन्स्ट्रक्सन लगायतका निर्माण कम्पनीविरुद्ध स्थानीयले धर्ना दिएका छन् ।
संसदीय निर्वाचन क्षेत्र ४ मा पर्ने ति सडक निर्माणका लागि ठेक्का लागेको ९ वर्ष भइसक्दा पनि सडक नबनेपछि सांसदसहित स्थानीयले धर्ना दिएका हुन् । अहिलेसम्म ति सडकको काम २० प्रतिशत भन्दा कम मात्रै काम भएको र फेरि पुरानै कम्पनीलाई २ वर्षको म्याद थप गरी ठेक्का दिन लागिएको भन्दै स्थानीयले विरोध गरेका हुन् ।
सोही क्षेत्रबाट निर्वाचित कांग्रेस सांसद थापाको नेतृत्वमा त्यहाँका उपभोक्ता र स्थानीय सरोकारवालाले सडक निर्माणमा देखिएको ढिलाइ अन्त्य नहुँदासम्म धर्ना गर्ने चेतावनी दिएका छन् । थापाले स्थानीयको अनुरोधलाई बेवास्ता गरे सडक विभाग र मन्त्रालयविरुद्ध सुरु गरिएको सडक संघर्षलाई सिंहदरबार भित्र लाने चेतावनी दिनुभयो ।
काठमाडौं क्षेत्र नम्बर ४ भित्र दर्जन बढी सडक निर्माणधीन छन्। अधिकांश सडकको ठेक्का शैलुङ कन्स्ट्रक्सन कम्पनीले लिएको छ । शैलुङ कन्ट्रक्सनले भक्तपुर नगरकोट सडक अलपत्र परेको भन्दै स्थानीय आन्दोलनमा छन् भने संसद्को विकाश समितिले अनुगमन गरेर निर्माण सम्पन्न गर्न सचेत गराएको छ ।








































