नेपाल प्रहरीले वैदेशिक रोजगारीमा रहेका व्यक्तिको नक्कली फेसबुक अकाउन्ट बनाएर अनलाइन ठगी गरेको आरोपमा दुई जनालाई पक्राउ गरेको छ । पक्राउ पर्नेमा पर्सा र बाराका दुई युवक रहेका छन् ।
पक्राउ पर्नेमा बारा प्रसौनी गाउँपालिका-१ का २० वर्षीय जस्मुदिन अन्सारी र पर्सा बहुदरमाई नगरपालिका-१ का २० वर्षीय विशाल पटेल छन् । उनीहरूलाई जिल्ला प्रहरी कार्यालय पर्साबाट खटिएको टोलीले वीरगञ्ज महानगरपालिका-८ बाट शनिबार पक्राउ गरेको हो ।
प्रहरीको प्रारम्भिक अनुसन्धानका अनुसार उनीहरूले वीरगञ्ज महानगरपालिका-१६ का ४९ वर्षीय शिव पुजन बैठाको घरमा डेरा बसी ठगी धन्दा चलाइरहेका थिए ।
कसरी भयो ठगी ?
पक्राउ परेका दुवै जनाले हाल बेलायतको लन्डनमा वैदेशिक रोजगारीमा रहेका रौतहटका एक व्यक्तिको तस्बिर प्रयोग गरी नक्कली फेसबुक अकाउन्ट र मेसेन्जर आईडी बनाएका थिए ।
उक्त नक्कली अकाउन्टमार्फत उनीहरूले घरभेटी शिव पुजन बैठालाई बेलायतमा रहेका पीडितसँगै कुराकानी भइरहेको विश्वास दिलाए । ‘विश्वासिलो’ कुराकानीको जालमा पारेर उनीहरूले बैठाबाट पटक-पटक गरी २ लाख ५० हजार रुपैयाँ ठगी गरेको प्रहरीले जनाएको छ ।
यस घटनामा पक्राउ परेका दुवै जनाविरुद्ध ठगी सम्बन्धी कसुरमा जिल्ला अदालत पर्साबाट सात दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय पर्साले जनाएको छ ।








































