गोरखा । भिमसेनथापा गाउँपालिकाले आगामी आर्थिक वर्ष २०८३/०८४ का लागि आफ्नो नयाँ कृषि नीति सार्वजनिक गरेको छ। गाउँपालिकाले रैथाने बालीको संरक्षण र स्थानीय अर्थतन्त्रलाई चलायमान बनाउने उद्देश्यसहित घरेलु मदिरा उत्पादनलाई प्रवर्द्धन गर्ने नीति अघि सारेको हो।
नयाँ नीति अनुसार गाउँपालिकाले घरेलु मदिरा (लोकल रक्सी) उत्पादन प्रयोजनका लागि कोदो खेती गर्ने स्थानीय किसानहरूलाई विशेष आर्थिक तथा प्राविधिक अनुदान उपलब्ध गराउने घोषणा गरेको छ।
नयाँ कृषिका मुख्य बुँदाहरू:
कोदो खेतीमा अनुदान: घरेलु मदिराको मुख्य कच्चा पदार्थको रूपमा रहेको कोदो उत्पादन बढाउन किसानहरूलाई बीउ, मल र प्रविधिमा अनुदान दिइनेछ।
स्थानीय ब्रान्डिङको तयारी: परम्परागत रूपमा उत्पादन हुँदै आएको घरेलु मदिरालाई कानुनी दायरामा ल्याएर गुणस्तर मापन (Quality Control) गरी ब्रान्डिङ गर्ने योजना गाउँपालिकाको छ।
रैथाने प्रविधिको आधुनिकीकरण: परम्परागत मदिरा उत्पादन शैलीलाई सुरक्षित र व्यवस्थित बनाउन किसानहरूलाई आवश्यक तालिम प्रदान गरिनेछ।
गाउँपालिकाको भनाइ: “हाम्रो स्थानीय पहिचान र परम्परासँग जोडिएको कोदो खेती पछिल्लो समय संकटमा पर्दै गएको छ। यसलाई घरेलु मदिरा उत्पादनसँग जोडेर व्यावसायिक रूप दिन सकिएमा एकातिर बाँझो जमिनको सदुपयोग हुनेछ भने अर्कोतिर युवाहरूका लागि स्थानीय स्तरमै रोजगारी सिर्जना हुनेछ।”
यो नीति लागू भएसँगै भिमसेनथापा गाउँपालिका घरेलु मदिरा उत्पादन र कोदो खेतीलाई औपचारिक रूपमै नीतिगत प्राथमिकता दिने जिल्लाकै अग्रणी स्थानीय तह बनेको छ। यस कदमले स्थानीय किसानहरूमा उत्साह थपेको छ भने नीति कार्यान्वयनको पाटोलाई सर्वसाधारणले चासोका साथ हेरेका छन्।








































