Opens in a new tab
२०८३ मंसिर ४, बिहीबार
११:०७:२५ बिहान
- ADVERTISEMENT -

थाइल्यान्डसँग पराजित हुँदै नेपाल एसिया कपमा छनोट हुन असफल

प्रकाशित मिति: २०८३ जेठ २७, बुधबार

106
Shares

काठमाडौं, जेठ २७ — नेपाली महिला क्रिकेट टोली एसीसी महिला प्रिमियर कपको क्वाटरफाइनलमा थाइल्यान्डसँग पराजित हुँदै आगामी महिला एसिया कपमा छनोट हुन असफल भएको छ।

मलेसियामा बुधबार बिहान सम्पन्न क्वाटरफाइनल खेलमा थाइल्यान्डले नेपाललाई ५६ रनले पराजित गर्दै सेमिफाइनल यात्रा तय गर्दा नेपालको एसिया कप खेल्ने सपना अधुरै रह्यो।

थाइल्यान्डले दिएको १३१ रनको लक्ष्य पछ्याएको नेपालले निर्धारित २० ओभरमा ७ विकेट गुमाउँदै मात्र ७४ रन बनाउन सक्यो। नेपालको ब्याटिङ प्रदर्शन कमजोर रहँदा कुनै पनि खेलाडीले प्रभावशाली इनिङ्स खेल्न सकेनन्।

नेपालका लागि कप्तान रुबिना क्षेत्रीले अविजित २० रन बनाइन्। सोनी पाख्रिनले १५, सीता रानामगरले १२ तथा सम्झना खड्काले ११ रनको योगदान दिँदा अन्य ब्याटर दोहोरो अंकमा पुग्न सकेनन्।

थाइल्यान्डका बलर थिपात्चा पुथावङले उत्कृष्ट प्रदर्शन गर्दै ४ ओभरमा मात्र ७ रन खर्चेर २ विकेट लिइन्। सुनिदा चतुरोङरतना र सुलिपर्न लाओमीले समान २–२ विकेट लिए भने फनिता मायाले १ विकेट हात पारिन्।

यसअघि टस जितेर पहिले ब्याटिङ गरेको थाइल्यान्डले निर्धारित २० ओभरमा ४ विकेट गुमाएर १३० रन बनाएको थियो। थाइल्यान्डका लागि नानापत कोन्चारोन्काइले अविजित ६३ रनको अर्धशतकीय इनिङ्स खेलिन्। उनले ५१ बलमा उत्कृष्ट ब्याटिङ गर्दै टोलीलाई प्रतिस्पर्धात्मक योगफलसम्म पुर्‍याइन्। फनिता मायाले २६ तथा चनिदा सुथिराङले १६ रन थपेका थिए।

नेपालका लागि कविता कुँवर, रिया शर्मा र रुबिना क्षेत्रीले समान १–१ विकेट लिए।

यस हारसँगै नेपाली महिला टोलीले पछिल्लो समय लगातार दोस्रो ठूलो अन्तर्राष्ट्रिय छनोट प्रतियोगिता गुमाएको छ। गत साता सम्पन्न एसियन गेम्स छनोट प्रतियोगितामा पनि नेपाल निर्णायक खेलमा चीनसँग पराजित हुँदै एसियन गेम्समा स्थान बनाउन असफल भएको थियो।

- ADVERTISEMENT -