राष्ट्रिय विपद् जोखिम न्यूनीकरण तथा व्यवस्थापन प्राधिकरणले मनसुनका ६० दिनको अवस्था सार्वजनिक गर्दै देशभर नै सरदरभन्दा कम वर्षा भएको जानकारी गराएको छ ।
गएको जेठ १५ गते (मे २८) राति मनुस नेपाल भित्रिएको थियो । त्यसयता साउन ११ गतेसम्मको अवस्था प्रतिवेदन सार्वजनकि गर्दै प्राधिकरणले वर्षा कम हुँदा तराई झनै प्रभावित भएको जनाएको हो ।
जेठ १५ मा भित्रिएको मनसुन देशभर फैलन करिब तीन साता लागेको थियो । त्यसपछि सक्रिय रहेको मनसुन केही समयपछि निष्क्रिय रह्यो । असारको दोस्रो साता केही सक्रिय रहे पनि देशैभरि सरदरभन्दा कम पानी परिरहेको प्राधिकरणले जनाएको छ
प्राधिकरणका प्रवक्ता शान्ति महतका अनुसार, यो अवधिमा बाढी, पहिरो र चट्याङबाट मात्र ४३ जनाको मृत्यु भएको छ । मनसुनजन्य विपद्का समग्र घटनालाई केलाउँदा गत वर्षको तुलनामा यसपालि कम छ । मानवीय र भौतिक क्षति पनि कम नै रहेको प्राधिकरणले जानकारी दिएको छ ।
“असार २४ गते रसुवाको भोटेकोसी नदीमा अकस्मात् आएको बाढीले ठूलो धनजनको क्षति गरेको छ । वर्षा नै नभई रातको समयमा अकस्मात् बाढी आएका कारण मानिसहरूले सुरक्षित ठाउँसम्म पुग्न समय नै पाएनन् । बाढीका कारण २० जना बेपत्ता भएकामा १२ वटा शव तथा मानव अंग फेला पारिएकामा हालसम्म दुईवटा शवको मात्र पहिचान भएको छ,” प्राधिकरणले सार्वजनिक गरेको विवरणमा उल्लेख छ ।
बेपत्तामध्ये दुईजना सम्पर्कमा आइसकेका र सोही बाढीका कारण नुवाकोटको विदुर नगरपालिका–८, इन्द्रेणीघाटमा फसेका एक दम्पतीको हेलिकोप्टरबाट उद्धार गरिएको थियो ।
यो वर्षको मनसुनमा पानी कम परेका कारण मधेस प्रदेश सबैभन्दा बढी प्रभावित भएको र धान रोपाइँ र बालीनाली लगाउनुपर्ने बेला भएकाले त्यहाँको जनजीवन नराम्ररी प्रभावित भइरहेको प्राधिकरणको प्रतिवेदनमा उल्लेख छ ।
पिउने पानी र सिँचाइका स्रोत समेत सुकेपछि मधेस प्रदेश सरकारले प्रदेशलाई असार २६ गते सुक्खाग्रस्त घोषणा गरेको छ । मधेसलाई संघीय सरकारले यही साउन ७ गते विपद् संकटग्रस्त क्षेत्र घोषणा गरेको छ ।
यसै सन्दर्भमा प्राधिकरणले राष्ट्रसंघीय निकाय, राष्ट्रिय तथा अन्तर्राष्ट्रिय गैरसरकारी संस्था र रेडक्रसलाई आफ्ना कार्यक्रम आवश्यकताअनुसार परिमार्जन गरी मधेसकेन्द्रित गर्न अनुरोध गरिसकेको जनाएको छ ।
तीनै तहका सरकार र विभिन्न संघसंस्थाको सहकार्यमा दीर्घकालीन समाधानका निम्ति पिउने पानी र सिँचाइको सम्भाव्यता खोजी गर्ने कार्य भइरहेको प्राधिकरणले जानकारी दिएको छ । रासस
प्रतिवेदन पढ्नोस्–








































