दुई दिवसीय रेडबल क्रिकेट प्रतियोगिता जय ट्रफीमा आइतबार लिग चरणका खेल सकिएका छन् । चार टिम सहभागी खेलमा एक टिमले तीन तीन खेल खेलेका थिए । मधेश प्रदेश, बागमती प्रदेश तथा विभागीय टिम नेपाल पुलिस क्लब र त्रिभुवन आर्मी क्लबले जनकपुर वीरगञ्जमा रेडबल प्रतियोगिता खेलेका हुन् । यसअघि भएको पीएम कपका शीर्ष चारमा रहेका टिमबीच भएको जय ट्रफीमा राष्ट्रिय टिमका खेलाडीको प्रभुत्व रहेको विभागीय टिमको दबदबा रह्यो ।
आइतबार लिग चरणका अन्तिम खेलमा पुलिस क्लबले बागमती र आर्मी क्लबले मधेश प्रदेशलाई पराजित गरे । जारी प्रतियोगितामा दुई जित र एक ड्रसहित पुलिस शीर्ष स्थानमा रहँदै फाइनल पुगेको छ भने आर्मी दुई ड्र र एक जितका साथ दोस्रो स्थानमा रहँदै फाइनल पुगेका छ । यी दुई टिमबीच मंगलबार फाइनल खेल हुनेछ ।
आइतबार आर्मीले वीरगञ्जमा भएको खेलमा मधेश प्रदेशमाथि त्रिभुवन आर्मी क्लबले सहज जित हात पारेको छ । आइतबार खेलको दोस्रो तथा अन्तिम दिन जितका लागि पाएको २८ रनको सामान्य लक्ष्य उसले २ विकेट गुमाएर पूरा गरेको हो ।
आर्मीका लागि दोस्रो पारीमा इमरान शेखले नटआउट ८ र वसिर अहमदले ४ रन बनाए । मधेशका लागि रञ्जित कुमार र प्रदिव पासवानले एक एक विकेट लिए । आर्मीको पहिलो जित हो । जितसँगै उसले फाइनल खेल्ने पक्का भएको छ ।
फ्लोअनमा परेको मधेश आइतबार दोस्रो दिनको खेलमा १५० रनमा अलआउट हुँदा उसको अग्रता मात्र २७ रन मात्र थियो । आर्मीले पहिलो पारीमा २२५ रनमा ९ विकेट गुमाउँदा पारी घोषित गरेको थियो ।
त्यसपछि ब्याटिङ गरेको मधेश पहिलो पारीमा १०२ रन बनाउँदा अलआउट भयो र उसले फ्लोअन खेल्नुपरेको थियो । तर, मधेशका लागि ओपनर मयन यादवबाहेक अन्य ब्याटरले राम्रो खेल्न नसक्दा उसले २८ रनको सामान्य लक्ष्य दिएको हो ।
मधेशका लागि दोस्रो पारीमा मयन यादवले ४९ रन बनाए भने कप्तान हरिशंकर साहले २५ रन बनाए । मयनले पहिलो पारीमा ११ रन बनाएका थिए ।
मधेशको ब्याटिङ ध्वस्त बनाउने क्रममा आर्मीका बसिर अहमदले ४ विकेट लिए भने उनले पहिलो पारीमा एक विकेट लिएका थिए । यस्तै शाहाब आलमले पहिलो पारीमा ६ र दोस्रो पारीमा ३ विकेट लिए ।
जनकपुरमा भएको अर्को खेलमा पुलिसले बागमतीलाई प्रदेशलाई ५ विकेटले पराजित गरेको हो । आइतबार खेलको दोस्रो तथा अन्तिम दिन जितका लागि पुलिसले ११६ रनको लक्ष्य पाएको थियो । सो लक्ष्य उसले ५ विकेट गुमाएर पूरा गरेको हो ।
पुलिसलाई जित दिलाउन कप्तान कुशल भुर्तेलले पहिलो पारीमा ८ र दोस्रो पारीमा ३२ रन बनाए भने उनले पहिलो पारीमा २ र दोस्रो पारीम १ विकेट लिए । यस्तै अमित श्रेष्ठले पहिलो पारीमा ७९ र दोस्रो पारीमा ५६ रन बनाए । यस्तै अर्जुन साउदले पहिलो पारीमा ७७ र दोस्रो पारीमा नटआउट २० रन बनाए ।
प्रतियाेगितामा पुलिसले दुई जित र एक ड्र खेल्दा आर्मीले एक जित र दुई ड्र खेल्यो । यस्तै मधेश दुईमा पराजित भयो भने एक खेल ड्र रह्यो । यस्तै बागमतीले एक हार र दुई ड्र खेल्यो ।









































