काठमाडौं महानगरपालिकाले घरवहाल कर लगायतको बजार अनुगमनलाई तीव्र पारेको जनाएको छ । वैशाख २१ गतेबाट सुरु गरेको महानगरको घरवहाल कर लगायतको बजार अनुगमन आजसम्म पनि जारी छ ।
महानगरपालिकाको राजस्व विभागले ‘अनुगमन टोली परिचालन कार्यक्रम-२०८०’ अभियानको रुपमा तीन प्रकारका राजस्व अनुगमन टोलीको व्यवस्था गरेर बजारमा पठाएको हो । महानगरले जनप्रतिनिधि, कर्मचारी, राजस्व विभाग कर्मचारी सहितको टोलीले पसल तथा कम्प्लेक्सहरुमा घरवहाल कर र महानगरलाई तिर्नुपर्ने कर तिरे/नतिरेकोबारे अनुमगन थालेका हुन् । महानगरले कर बुझाउने करदातालाई धन्यवाद दिने र कर नबुझाउने करदातालाई कर तिर्न आग्रह गर्ने अभियान चलाएको बताएको छ ।
महानगरको टोलीले न्युरोड क्षेत्रमा अनुगमन गर्दा व्यवसाय दर्ता भए पनि नवीकरण नगरेको र घरवहाल करमा समस्या देखिएको काठमाडौं महानगर राजस्व विभागका राजस्व अधिकृत रामजी श्रेष्ठले बताए । उनले नेपाल सरकार र महानगरलाई पनि घरवहाल कर तिर्नुपर्ने भएकाले समस्या देखिएको बताए ।
बहालकर तिर्ने रकम फरक पाइएकाले महानगरपालिकाले विचार गर्नुपर्ने देखिएको उनको भनाइ छ ।
उनले भने, ‘यथार्थ वहाल कर, व्यवसाय कर तिरेको हो कि होइन भन्नेकुरा मापन गर्न खोजेका हौं । कतै-कतै फरक देखिएको छ । व्यवसाय त धेरै छ, नवीकरण गर्न बाँकी छ, फाट्टफुट्ट दर्ता भएको छ । उनहरुलाई हामीले दर्ता गर्न निर्देशन दिएका छौं । हुन्छ भन्नुभएको छ ।’
महानगरपालिकाले वहाल करलाई व्यवस्थित गर्न तथा बहाल लिने र दिने बीचका सर्त व्यवस्थापन गर्न ‘वहाल व्यवस्था कार्यविधि’ समेत जारी गरेको छ ।







































