काठमाडौं- काठमाडौंको स्वयम्भूमा मृत फेला परेकी ३९ वर्षीया ईश्वरी श्रेष्ठका श्रीमान रामप्रसाद सुनार झुन्डिएकाे अवस्थामा फेला परेका छन्। उनकाे शव जंगलमा फेला परेकाे हाे।

प्रहरीले ईश्वरीसहित उनका दुई छाेरी ८ वर्षीया अनिशा र २ वर्षीया शिवानी मृत फेला परेसँगै उनका श्रीमानकाे खाेजी गरेकाे थियाे। खाेजी गर्ने क्रममा उनीहरू बस्ने घर नजिकैकाे जंगलमा रामप्रसादकाे शव फेला परेकाे हाे।
घटनास्थलकाे बारेमा थप अनुसन्धान गर्न प्रहरी वृत्त स्वयम्भू, जिल्ला प्रहरी परिसर, काठमाडौं र काठमाडौं उपत्यका अपराध अनुसन्धान कार्यालयको टोली खटिएको छ।
श्रीमानले श्रीमती र छाेरीकाे हत्या गरेपश्चात् आफूले आत्महत्या गरेकाे हुनसक्ने प्रहरीकाे प्रारम्भिक आशंका छ।
यसअघि काठमाडौंको स्वयम्भूमा आमासहित दुई छाेरी मृत फेला परेका थिए। नागार्जुन नगरपालिका वडा नम्बर ६ स्वयम्भूस्थित एक घरको डेरामा बस्ने ३९ वर्षीया ईश्वरी श्रेष्ठ, उनकी ८ वर्षीया छोरी अनिशा श्रेष्ठ र २ वर्षीया छोरी शिवानी श्रेष्ठ मृत फेला परेका थिए।
सबै जनाकाे घरेलु हतियार प्रहार गरी हत्या गरेको प्रहरीको आशंका थियो। घटनास्थलमा श्रीमान रामप्रसाद फेला नपरेपछि उनी शंकाकाे नजरमा परेका थिए। उनकाे खाेजी भइरहेकाे प्रहरीले जनाएकाे थियो।
प्रहरीले घटनाबारे थप अनुसन्धान गरिरहेकाे छ।








































