नेपाल मलेसियामा जारी एसिसी महिला प्रिमियर कप टी–२० प्रतियोगिताको सेमिफाइनलमा प्रवेश गरेको छ । बुधबार भएको क्वाटरफाइनल खेलमा कुवेतलाई डकवर्थ लुईस पद्धतिअनुसार ८ विकेटले हराउँदै नेपाल सेमिफाइनल प्रवेश गरेको हो । नेपालले अब शुक्रबार सेमिफाइनलमा घरेलु टोली मलेसियाको सामना गर्नेछ ।

क्वाटरफाइनलमा वर्षाले प्रभावित पारेको खेलमा नेपाललाई जितका लागि १२ ओभरमा ५० रन बनाउनुपर्ने थियो । तर, नेपालले ५० रन ६.५ ओभरमा पूरा गर्यो । त्यसक्रममा नेपालले २ विकेट गुमायो ।

नेपालको जितमा कप्तान इन्दु वर्माले अविजित २२, सीता राना मगरले १७, कविता जोशीले अविजित चार र कविता कुँवरले एक रन बनाए । कुवेतका लागि मारियाम ओमरले मात्र एक विकेट लिन सकिन् ।
त्यसअघि मलेसियाको बांगीमा टस जितेर ब्याटिङ रोजेको कुवेतले निर्धारित २० ओभरमा ९ विकेट गुमाएर ७३ रन बनायो । उसका लागि प्रियदा मुरलीले ३३ बलमा तीन चौका र एक छक्कासहित सर्वाधिक २९ रन बनाइन् ।
नेपालका लागि सीता राना मगरले ह्याट्रिक विकेट लिइन् । उनले ४ ओभरमा ११ रन मात्र दिएर ह्याट्रिक लिएकी हुन् । यस्तै, रुबिना क्षेत्री र कविता कुँवरले दुई/दुई विकेट हात पारे । जारी प्रतियोगितामा नेपाल अपराजित छ ।

समूह ‘डी’ विजेता नेपालले ग्रुप स्टेजमा हङकङ र भुटानलाई ८/८ विकेट तथा माल्दिभ्सलाई २ सय १४ रनले हराएको थियो । जारी प्रतियोगितामा १६ टोलीको सहभागिता रहेको छ । फाइनल पुग्ने दुई टोलीले एसिसी महिला एसिया कपमा छनोट हुनेछन् ।
त्यस्तै, सेमिफाइनल पुग्ने चार टोली इमर्जिङ एसिया कपमा छनोट हुनेछन् । आजको जितसँगै नेपालले इमर्जिङ एसिया कप खेल्ने पक्का भएको छ








































