काठमाडौं । गएको चुनावबाट प्राप्त नतिजा र त्यसपछि निर्माण भएको सरकारको आरोह अवरोहलाई पछिल्लो समय मुलुक संकटमा जान थालेको अर्थमा हेर्न थालिएको छ ।
सत्तारुढ दलका शीर्ष नेताहरुले नै देशको नेतृत्वमा केहि नेताहरु रहेपनि चलाउने अरु नै भएको भन्दै टिप्पणी हुने गरेको छ ।
सरकार बनेको लामो समयसम्म सरकारले पूर्णता नपाउनु र राजनीतिक गतिविधि बढेपनि जनताका समस्याभन्दा स्वार्थ केन्द्रित छलफल बाक्लिनुले पनि प्रश्न थप गम्भीर बन्न पुगेको छ ।
सरकारको नेतृत्व गरिरहेको नेकपा माओवादी केन्द्रका उपाध्यक्ष तथा पूर्वसभामुख कृष्णबहादुर महराले सरकारको नेतृत्व प्रचण्ड, केपी ओली र शेरबहादुर देउवा जसले गरेपनि चलाउने व्यक्ति अरु नै हुने भन्दै सनसनीपूर्ण बयान दिए ।
सरकारले पूर्णता पाउन नसकेको र सरकार जोगाउनमै गठबन्धनमा किचलो बढिरहेको बेला महराले दिएको यस्तो बयानले सबैको ध्यान केन्द्रित ग¥यो ।
राजनीति अस्थिर जतिधेरै बन्दै गएको छ त्यत्ति नै सरकारको डेलिभरी पनि कमजोर बन्न पुगेको छ । यसरी नै कांग्रेस महामन्त्री गगन थापाले समेत सरकारको आलोचना खुब गर्ने गरेका छन् । गगन थापाले प्रधानमन्त्री प्रचण्डलाई संसददेखि विभिन्न स्थानमा आलोचना गर्ने गरेका छन् ।
गगन मात्रै होइन अर्थमन्त्री डाक्टर प्रकाशशरण महतले पनि सरकारको काम सोचे जसरी हुन नसकेको बताउने गरेका छन् ।
सरकारबारे सत्तारुढ दलमात्रै नभएर प्रतिपक्षीले समेत आलोचना गरिरहेको यस समयमा नेपाल कम्युनिष्ट पार्टीका महासचिव समेत रहेका प्रचण्डका पूर्वसहकर्मी नेत्रविक्रम चन्द ’विप्लव’ले पनि सरकारको कार्यशैलीमाथि आचोलना गरेका छन् ।
मुलुक सरजारविहीन बनेको भन्दै देशमा संकट विद्यमान भएको र कुन बेला के हुन्छ भन्न नसकिने उनको दाबी छ ।
मुलुक आफ्नै उत्पादनमा निर्भर हुन नसके टाट पल्टिने बताएका विप्लवले झैं पछिल्लो समय देशमा संकट गहिरिन थालेको टिप्पणी जताततै छ ।
सरकारले नै पूर्णता पाउन नसक्दा पनि जनतामा आक्रोश देखिन्छ । सरकार बनेपनि गठबन्धन दलभित्र रहेको आन्तरिक लडाईँ र प्रतिष्पर्धाका कारण पनि सरकारप्रति जनताको अपेक्षा दुखद् बन्दै गएको छ । देश उपचुनाव केन्द्रित भएको छ ।
उपचुनावमा दलीय सक्रियता जसरी देखिन थालेको छ, विकास समृद्धिका निम्ति यसरी नै नेताहरु जुट्ने हो भने मात्रै पनि धेरै हुन सक्ने देखिन्छ । तर, चुनावी अंकगणित र गएको चुनावबाट प्राप्त जनमतका कारण पनि समस्या थप चुलिने अवस्थामा देखिन्छ । न्युज २४ नेपालबाट








































