पाल्पा — स्वतन्त्र विद्यार्थी युनियनको निर्वाचन अन्तर्गत पाल्पा रामपुरको सहिद बहुमुखी क्याम्पसमा नेपाल विद्यार्थी संघ र अखिल क्रान्तिकारीको संयुक्त प्यानलबाट उम्मेदवार बनेका ल्याकत अली सभापतिमा विजयी भएका छन् । एमाले निकट अनेरास्ववियुका उम्मेदवार सन्देश ढकाललाई ३२ मतले पछि पार्दै अली विजयी भएका हुन् ।
आइतबार भएको निर्वाचनपछि राति अबेर सम्पन्न मतगणनामा प्रत्यक्षतर्फ सबै पदमा नेविसंघ र अनेरास्ववियु (क्रान्तिकारी) को संयुक्त प्यानल विजयी भएको निर्वाचन अधिकृत सूर्यप्रसाद घिमिरेले बताए । सभापतिमा निर्वाचित अलीले ३ सय २४ मत प्राप्त गर्दा उनका प्रतिस्पर्धी अखिलका ढकालले २ सय ९२ मत पाए । सचिवमा नेवि संघका रमेश पोखरेलले ३ सय ४६ मत प्राप्त गर्दा अखिलकी रमा श्रेष्ठले २ सय ६५ मत पाइन् ।
कोषाध्यक्षमा संयुक्त प्यानलका तिलक सारु ३ सय ३१ मत सहित विजयी हुँदा प्रतिस्पर्धी अखिलकी दुर्गा विकले २ सय ७७ मत प्राप्त गरे । सदस्यमा कसम मल्ल ठकुरी, कविता राना, जयन्ती दर्जी, अस्मिता खनालर महेश राक्से निर्वाचित भए । कुल मतदाता ७ सय ८२ मध्ये ६ सय ५२ मत खसेको थियो ।
समानुपातिकतर्फ नेविसंघ, अनेरास्ववियु, अनेरास्ववियु (क्रान्तिकारी)ले संगठन दर्ता गराएको थियो । समानुपातिकतर्फ नेपाल बिद्यार्थी संघले ३ सय २१, अनेरास्ववियुले २ सय ७६ र अनेरास्ववियु (क्रान्तिकारी ) ले ५१ मत प्राप्त गरेको छ । उपसभापति, सहसचिवसहित ५० प्रतिशत पदाधिकारी समानुपातिक मतको आधारमा चयन हुनेछ ।
समानुपातिकतर्फ भने नेपाल विद्यार्थी संघले १०, अनेरास्ववियुले १० र अनेरास्ववियु(क्रान्तिकारी)ले ६ जनाको नामावली पेश गरेका छन् । स्ववियु निर्वाचन अधिकृत सूर्यप्रसाद घिमिरेका अनुसार नेविसंघबाट दर्पण सोती, जनक पाण्डे, बन्दना गैरे, लक्ष्मी श्रेष्ठ, विवेक नेपाली, आशिष पोखरेल, दिक्षा ज्ञावली, विपिन गैरे, योगिता पंगेनी, निकिता पाठकको नाम सिफारिस गरेको छ ।
अनेरास्ववियुले नविना रेग्मी, त्रिशन न्यौपाने, शितल अधिकारी, नारन भण्डारी, शिरिषा विश्वकर्मा, सच्चा रेग्मी, राधिका गौतम, पवन भण्डारी, मिलन पौडेल र विमल गौतमको नाम सिफारिस गरेको छ । अनेरास्ववियु क्रान्तिकारीले चनिसरा सोती, हेम कुमारी सोती, विनु सोती, कान्तिसरा सुनारी, ममता सुनारी र राममाया सोतीको नाम समानुपातिकका लागि पठाएको छ । सहिख बहुमुखी क्याम्पसमा १५ सदस्यीय समिति रहनेछ ।ईकान्तिपुर








































