नेपाली राष्ट्रिय क्रिकेट टोलीका पूर्वकप्तान तथा स्टार स्पिनर सन्दीप लामिछाने र विकेटकिपर/ब्याटर अर्जुन साउँद इंग्ल्याण्डको द हन्ड्रेड क्रिकेट लिगको ड्राफ्टमा परेका छन् ।
द हन्ड्रेडले सार्वजनिक गरेको ड्राफ्ट सूचीमा नेपालबाट सन्दीप र अर्जुन अटाएका हुन् । उनीहरू विदेशी कोटाको ड्राफ्टमा परेका हुन् ।
ड्राफ्टमा सन्दीप र अर्जुनसहित ३ सय ६८ खेलाडी समावेश छन् । पहिलो संस्करणमा सन्दीप ओभल इन्भिन्सिबल्समा ६० हजार पाउण्डमा अनुबन्ध भएका थिए । यद्यपि भिसा समस्याका कारण उनले द हन्ड्रेड गुमाए ।
दोस्रो संस्करणमा भने सन्दीपमाथि कुनै पनि टोलीले चासो देखाएका थिएनन् । आउँदो सिजनको द हन्ड्रेड ड्राफ्टको २३ मार्चमा आयोजना हुँदैछ । लिग भने १ अगस्टबाट सुरु हुने तालिका छ ।








































