साफ यू–२० महिला च्याम्पियनसिप फुटबल प्रतियोगिताको उपाधिका लागि आज नेपालले आयोजक बंगलादेशसँग प्रतिस्पर्धा गर्दैछ । ढाकास्थित मोस्ताफा कमल रंगशालामा नेपाल र बंगालदेशबीचको साँझ ६ बजे प्रतिस्पर्धा हुनेछ ।
घरेलु टोली बंगलादेशलाई पराजित गर्दै उपाधि जित्ने लक्ष्यमा नेपाल रहेको छ । नेपाल लिग चरणमा भोगेको हारको बदला लिने दाउमा पनि छ ।
लिग चरणमा नेपाल बंगलादेशसँग ३–१ गोलले पराजित भएको थियो । त्यसपछि नेपालले भुटानलाई ४–० ले पराजित गरेको थियो । लिग चरणको अन्तिम खेलमा नेपालले भारतलाई ३–१ गोलले पराजित गर्दै फाइनलमा स्थान बनाएको हो । यता, नेपाललाई हराएको बंगलादेशले भने भारतसँग १–१ गोलरहित बराबरी खेलेको थियो । अन्तिम खेलमा भुटानलाई ५–० ले पराजित गर्दै बंगलादेश फाइनलमा पुगेको हो ।
शीर्ष स्थानमा रहेको बंगलादेशले तीन खेलमध्ये दुई खेलमा जित र एक खेलमा बराबरी खेल्दै सात अंक बनाएर फाइनल पुगेको हो । तीन खेलमध्ये दुई खेलमा जित र एक खेलमा हार व्यहोरेको नेपालले ६ अंक बनाएर फाइनलमा स्थान बनाएको थियो । भारत र भुटानभने प्रतियोगिताबाट बाहिरिसकेको छ ।








































