काठमाडौँ: दुई दशकभन्दा लामो समयदेखि थाती रहेको भुटानी शरणार्थी समस्याको दीर्घकालीन समाधान र भुटानका जेलमा रहेका नेपालीभाषी राजनीतिक बन्दीहरूको रिहाइका लागि पहल गर्न प्रधानमन्त्री बालेन्द्र शाहलाई आग्रह गरिएको छ। भुटानमा राजनीतिक बन्दीहरूको रिहाइका लागि द हेगस्थित ‘ग्लोबल क्याम्पियन’ र झापाको बेलडाँगीस्थित ‘भुटान स्वतन्त्र जनता मञ्च’ले संयुक्त रूपमा प्रधानमन्त्रीलाई खुला पत्र पठाउँदै कूटनीतिक सक्रियताका लागि आह्वान गरेका हुन्।
ग्लोबल कोअर्डिनेटर राम कार्की र महासचिव डीबी सुब्बाद्वारा हस्ताक्षरित उक्त पत्रमा भुटानमा अझै पनि कैयौँ नेपालीभाषीहरू राजनीतिक आस्थाका आधारमा बन्दी जीवन बिताइरहेको उल्लेख गर्दै उनीहरूको मानव अधिकार रक्षाका लागि नेपाल सरकारले तत्काल कदम चाल्नुपर्ने माग गरिएको छ। पत्रमा शरणार्थी समस्या केवल मानवीय सहायताको विषय मात्र नभई यो दक्षिण एसियाली क्षेत्रको कूटनीतिक र मानव अधिकारको गम्भीर मुद्दा भएको उल्लेख गरिएको छ।
विगतमा धेरै देशहरूमा पुनर्स्थापना भए पनि अझै ठुलो संख्यामा शरणार्थीहरू नेपालका शिविरमा कष्टकर जीवन बिताइरहेका छन्। अभियानकर्ताहरूले प्रधानमन्त्री शाहलाई भुटान सरकारसँग सिधा संवाद गरी जेलमा रहेका बन्दीहरूको अवस्था बुझ्न र उनीहरूको निःशर्त रिहाइका लागि अन्तर्राष्ट्रिय मञ्चहरूमा आवाज उठाउन समेत अनुरोध गरेका छन्। भुटानी शरणार्थीहरूको स्वदेश फिर्ती वा सम्मानजनक व्यवस्थापनका लागि नेपालले नेतृत्वदायी भूमिका खेल्नुपर्नेमा पत्रमा जोड दिइएको छ।
