टाइमको विश्वका १०० प्रभावशाली व्यक्तिमा प्रधानमन्त्री बालेन्द्र शाह
काठमाडौँ — प्रधानमन्त्री बालेन्द्र शाह बेलायतस्थित प्रतिष्ठित पत्रिका Time Magazine ले सार्वजनिक गर्ने विश्वका १०० प्रभावशाली व्यक्तिको सूचीमा परेका छन्। उक्त सूचीमा विश्वका २४ जना प्रभावशाली राजनीतिक नेताहरू समावेश छन्।
सूचीमा समावेश अन्य नेताहरूमा क्याथोलिक धर्मगुरु Pope Leo XIV, मेक्सिकोकी राष्ट्रपति Claudia Sheinbaum, क्यानाडाका प्रधानमन्त्री Mark Carney, चिनियाँ राष्ट्रपति Xi Jinping, जापानकी प्रधानमन्त्री Sanae Takaichi, इजरायलका प्रधानमन्त्री Benjamin Netanyahu, बंगलादेशका नेता Tarique Rahman तथा न्युयोर्क शहरका मेयर Zohran Mamdani लगायत रहेका छन्।
टाइमका पत्रकार Charlie Campbell ले शाहबारे लेख्दै उनको उदयलाई नयाँ पुस्ताको राजनीतिक परिवर्तनसँग जोडेका छन्। लेखमा ३५ वर्षीय शाहलाई पूर्व हिप–हप कलाकारबाट राजनीतिमा प्रवेश गरेका युवा नेताका रूपमा चित्रण गरिएको छ, जसले छोटो समयमै राष्ट्रिय नेतृत्वमा स्थान बनाएका छन्।
गत वर्ष शरद् ऋतुमा भएका घातक सडक प्रदर्शनहरूले पुराना राजनीतिक शक्तिविरुद्ध जनआक्रोश बढाएको थियो। विशेषगरी जेन–जी पुस्ताले भ्रष्टाचार र जनतासँगको दूरी बढाएका दलहरूलाई विस्थापित गर्ने माग गर्दै आन्दोलन चर्काएका थिए, जसले नयाँ नेतृत्व उदाउने वातावरण तयार गर्यो।
‘बालेन’ नामले परिचित शाह सिभिल इन्जिनियरिङमा स्नातक हुन्। प्रभावशाली व्यक्तित्व, स्पष्ट अभिव्यक्ति र भ्रष्टाचारविरुद्ध कडा अडानका कारण उनले चार वर्षअघि काठमाडौं महानगरपालिकाको मेयर पद जितेका थिए। हाल उनी करिब ३ करोड जनसंख्या भएको नेपालको नेतृत्व गरिरहेका छन्।
