अष्ट्रेलियाको उत्तरी क्षेत्र (Northern Territory) मा बसोबास गर्दै आएका नेपाली समुदायका सक्रिय युवा समाजसेवी निरोज देवकोटा गोर्खालीले आगामी कार्यकाल २०२५–२०२७ का लागि गैरआवासीय नेपाली संघ (एनआरएनए) एनटी स्टेट कोअर्डिनेशन काउन्सिल (SCC) अन्तर्गत उप संयोजक (Deputy Coordinator) पदमा आफ्नो उम्मेदवारी औपचारिक रूपमा घोषणा गरेका छन्। ‘समर्पण, सेवाभाव र युवाशक्तिको सशक्तिकरण’ भन्ने मूल दृष्टिकोणका साथ अगाडि बढेका देवकोटा अघिल्ला दुई कार्यकालमा एनआरएनए एनटीमा महत्वपूर्ण भूमिका निर्वाह गरिसकेका छन्। उनले २०२१–२०२३ मा युथ मेम्बरका रूपमा र हाल २०२३–२०२५ मा युथ कोअर्डिनेटरका रूपमा सक्रिय योगदान दिँदै आएका छन्।
संगठित र उत्तरदायी नेतृत्वमा विश्वास राख्ने देवकोटा गोर्खालीले आफ्नो कार्यकालमा समुदायका विविध वर्ग—युवा, विद्यार्थी, परिवार, पेशागत व्यक्ति—को आवाजलाई संस्थागत रूपमा प्रस्तुत गर्ने प्रतिबद्धता जनाएका छन्। साथै, उनले एनटी राज्यभित्र रहेका नेपालीहरूको जीवनस्तर सुधार गर्न स्थानीय र राष्ट्रिय संस्थाहरूसँग सहकार्यमा कार्यक्रम सञ्चालन गर्ने योजनासमेत सार्वजनिक गरेका छन्। समावेशी, पारदर्शी र आर्थिक जवाफदेही नेतृत्वमार्फत एनआरएनएलाई अझ क्रियाशील र सबैको पहुँचमा पुर्याउने आफ्नो प्राथमिकता रहेको उनले स्पष्ट पारेका छन्।
आगामी जुलाई २६, २०२५ मा हुने एनआरएनए एनटी निर्वाचनमा ‘अनुभवलाई भोट दिनुहोस्, प्रतिबद्धतालाई भोट दिनुहोस्’ भन्ने नाराका साथ आफूलाई सहयोग र समर्थन गर्न देवकोटाले सम्पूर्ण नेपाली समुदायसँग अनुरोध गरेका छन्। उनले भनेका छन्, “हामी सबै मिलेर हाम्रो समुदायलाई अझ एकीकृत, सक्षम र समृद्ध बनाउन सक्छौं। त्यसका लागि तपाईंहरूको अमूल्य मत मेरो लागि प्रेरणा हुनेछ।”







































