नेपाल क्रिकेट संघ (क्यान) ले नेपाल प्रिमियर लिग (एनपीएल) का लागि ८ मार्की खेलाडी छानेको छ । क्यानले शुक्रबार प्रेस विज्ञप्ती जारी गर्दै एनपीएलका लागि राष्ट्रिय टोलीमा रहेका ८ खेलाडीको नाम सार्वजनिक गरेको हो ।
क्यानले सार्वजनिक गरेका खेलाडीमा कप्तान रोहित कुमार पौडेल, दिपेन्द्र सिंह ऐरि, सन्दीप लामिछाने, सोमपाल कामी, करण केसी, आसिफ शेख, कुशल भुर्तेल र कुशल मल्ल छन् ।
कुन खेलाडी कुन टोलीको मार्की खेलाडीका रुपमा रहन्छन् भन्ने क्यानले विज्ञप्तिमा केही खुलाएको छैन । पछिल्लो ३ वर्षको प्रर्दशनलाई ध्यानमा राख्दै ८ खेलाडीको नाम सार्वजनिक गरिएको क्यानका प्रवक्ता छुम्बी लामाले विज्ञप्तिमा उल्लेख छ ।
उनीहरू एनपीएलमा कुन टोलीमा रहन्छन् भन्ने बारेमा भने शनिबार मात्रै टुंंगो लाग्नेछ। क्यानले शनिबार कार्यक्रम गर्दै फ्रेन्चाइज टोलीलाई आफ्नो मार्की खेलाडी रोज्न लगाउने बताएको छ । एनपीएल नोभेम्बर ३० देखि डिसेम्बर २१ सम्म हुने कार्यतालिका सार्वजनिक भइसकेको छ ।
