इटालियन सिरिए फुटबलको आफ्नो पछिल्लो खेलमा इन्टर मिलानले जित हात पारेको छ । इन्टर मिलानले शनिबार राति खेलिएको खेलमा एएस रोमालाई ४–२ गोलले हराएको हो ।
जितसँगै इन्टर मिलानले आफ्नो निकटतम प्रतिद्वन्द्वी युभेन्ट्ससँग सात अंकको स्पष्ट अग्रता हासिल गरेको छ । रोमाको घरेलु मैदानमा खेलिएको खेलमा सुरुआती अग्रता इन्टर मिलानले लिएको थियो ।
इन्टर मिलानका लागि खेल सुरु भएको १७औँ मिनेटमै फ्रान्सिस्को एसर्बीले पहिलो गोल गरेका थिए । खेलको २८औँ मिनेटमा रोमाका जियानलुका मान्सिनीले जवाफी गोल गरेका थिए ।
निर्धारित समयको ४४औँ मिनेटमा स्टिफन एल सारावीले गोल गरेपछि पहिलो हाफमा रोमा २–१ ले अगाडि बढेको थियो । खेलको ४९औँ मिनेटमा इन्टरका लागि मार्कुस थुरमले दोस्रो गोल गरेका थिए ।
खेल प्रतिस्पर्धात्मक रुपमा चलिरहँदा ५६औँ मिनेटमा रोमाका एन्जेलिनो बाट आत्मघाती गोल हुन पुगेको थियो । त्यही आत्मघाती गोल नै रोमाका लागि दुर्भाग्य बन्न पुग्यो ।
दोस्रो हाफको इन्जुरी समयको तेस्रो मिनेटमा इन्टर मिलानका लागि एलेज्यान्ड्रो बास्टोनीले चौथो गोल थपेका थिए । जारी सिजनको सिरिएमा सबै टोलीले कम्तिमा २३–२३ खेल खेलिसकेका छन् ।
२३ खेल खेलेको इन्टर मिलान ६० अंकसहित तालिकाको पहिलो स्थानमा आसिन छ । समान खेल खेलेको युभेन्ट्सको ५३ अंक छ । २४ खेल सकेको रोमा भने ३८ अंकसहित पाँचौँ स्थानमा छ ।








































