काठमाडौं– काठमाडौं महानगरपालिकाका मेयर बालेन्द्र साह (बालेन) को एउटा निर्णय विरुद्ध राष्ट्रिय स्वतन्त्र पार्टीका सभापति रवि लामिछाने मैदानमा उत्रिएका छन् ।
काठमाडौंको खुला मञ्चलाई फुटबल मैदान बनाउने महानगरपालिकाको तयारीविरुद्ध शुक्रवार खुला मञ्चमै प्रदर्शन भएको छ । महानगर प्रमुख बालेनले खुला मञ्चलाई फुटबल मैदान बनाउन छलफल थालेपछि त्यसको विरोध प्रारम्भ भएको हो ।
‘अकुपाइ टुँडिखेल’ ले खुलामञ्चलाई खुला नै रहन दिन खुलामञ्चमा आज दिउँसो प्रदर्शन गरेर महानगरपालिकाको निर्णयविरुद्ध उभिएको हो ।
र, यो प्रदर्शनमा पूर्व प्रधानमन्त्री डा. बाबुराम भट्टराईदेखि रास्वपाका सभापति रवि लामिछानेसम्म प्लेकार्ड बोकेर खुला मञ्चमा आयोजित विरोध प्रदर्शनमा उभिए । यो प्रदर्शन कलाकारहरु निर्मल शर्मा, गायक योगेश्वर अमात्य, भीम तुलाधर, पत्रकार ऋषि धमला, नेतृ हिसिला यमी आदि सहभागि थिए ।
उक्त प्रदर्शनपछि पूर्व प्रधानमन्त्री डा.भट्टराईले खुलामञ्च पञ्चायत कालदेखि लोकतान्त्रिक आन्दोलनहुँदै जनप्रतिरोधको प्रतिबिम्व स्थल’ रहेको बताउँदै यसलाई खुला नै रहन दिन माग गरे ।
डा.भट्टराईले सामाजिक सञ्जालमा लेखेका छन्– ‘खुलामञ्चलाई खुलै रहन दिऊँ । यो पञ्चायत कालदेखि लोकतान्त्रिक आन्दोलन र जनप्रतिरोधको प्रतिबिम्व स्थल हो ! मलाई जीवनमा पहिलो पटक २०३६ सालमा यसै मञ्चमा हृषीकेश शाहलगायतका मानव अधिकारवादी नेताहरूसंग उभिएर गणतन्त्रको पक्षमा बोलेको अझै सम्झना हुन्छ ! बरू खुला मञ्चलाई अझै व्यवस्थित गरेर आम जनता र संगठनहरूले जनआवाज खुला रूपले मुखरित गर्नसक्ने सार्वजनिक स्थल बनाउँ ! जीवन्त लोकतन्त्रमा संसद मात्र हैन सडक पनि जनदबाब र जनमत प्रदर्शन गर्ने महत्वपूर्ण थलो हुन्छ भन्ने नभुलौ। हिजोका आन्दोलनकारीहरू आज सत्तासीन हुन पुगेपछि सडकको जनआवाज कुण्ठित गर्दै जान थाल्नु लोकतन्त्रनिम्ति शुभसंकेत हैन ।’








































