मोरङ– विद्यार्थीको स्वास्थ्यलाई ध्यानमा राख्दै विराटनगर महानगरपालिकाले बढ्दो गर्मीका कारण सार्वजनिक तथा संस्थागत विद्यालयको बिदाको समय लम्बाएको छ।
महानगरपालिका मेयर नागेश कोइरालाले महानगरपालिकाअन्तर्गत सञ्चालित विद्यालयमा बिदाको समय बढाइएको जानकारी दिए।
पछिल्लो केही दिनदेखि तराई क्षेत्रमा गर्मी बढेको हुँदा विद्यालयमा पठनपाठनमा कठिनाइ हुने र विद्यार्थीको स्वास्थ्यमा प्रतिकूल असर पर्न सक्ने हुँदा बिदा थपिएकाे हाे।
जल तथा मौसम विज्ञानका अनुसार अझ थप केही दिन तराई क्षेत्रमा तातो हावा र लु लाग्न सक्ने सम्भावना रहेको हुँदा जेठ २१ देखि २३ गतेसम्म बिदालाई निरन्तरता दिइको मेयर कोइरालाले जानकारी बताए।
यसअघि बढ्दो गर्मीकै कारण महानगरले १७ गतेदेखि १९ गतेसम्म बिदा दिइएको थियो।
महानगरका प्रमुख प्रशासकीय अधिकृत राजेन्द्र पराजुलीका अनुसार महानगरको शैक्षिक क्यालेण्डरअनुसार श्रावण महिनाको बर्खे बिदा कट्टा हुने गरी बिदाको व्यवस्थापन गरिएको हो।
महानगरपालिका मातहत १९ वटा वडामा गरी कुल ७४ वटा सामुदायिक र सार्वजनिक विद्यालय रहेका छन्।
विराटनगरमा गर्मीका कारण दिउँसो सडकमा सवारी, र सर्वसाधारणको हिँड्डुल अत्यन्त कम रहेको छ।








































