विराटनगर । युवा तथा खेलकुद मन्त्री डिग बहादुर लिम्बुले पहिले देखि नै खेलकुद क्षेत्र प्राथमिकतामा नपरेको अवस्थामा यसपटक पनि बजेट कटौती गरेर सन्तुलन कायम नगरिएको बताएका छन् ।
विराटनगरमा सञ्चारकर्मीहरु सँग कुरा गर्दै मन्त्री लिम्बुले बजेट छलफलका क्रममा अर्थ मन्त्रालयले थप सशोधन गर्ने आशा व्यक्त गर्दै पार्र्टीका नेता र प्रधानमन्त्रीलाई यसबारे ध्यानाकर्षण गराउने समेत बताए । उनले यसपालि सन्तुलित बजेट नआएको भन्दै असन्तुष्टि जनाएका हुन् ।
उनले रेशम चौधरीको कैद मिनाहाबारे पनि टिप्पणी गर्दै मुलुकलाई राजनैतिक निकास दिनुपर्ने भएकाले यसको विकल्प नभएको बताए । मन्त्री लिम्बुले अदालतको आदेशको सरकारले उच्च सम्मान गरेको बताउँदै राजनैतिक निकास दिनका लागि अप्रिय लाग्ने निर्णय गर्न बाध्य भएको रुपमा बुझिदिन आग्रह समेत गरे ।








































