काठमाडौँ । आगामी वैशाख १० गते हुने उपचुनावका लागि तनहुँ निर्वाचन क्षेत्रनम्बर १ बाट राष्ट्रिय स्वतन्त्र पार्टीका उम्मेदवार रहेका स्वर्णिम वाग्लेले चुनाव जित्नेमा आफू ढुक्क भएकाे बताएका छन् ।
उनले तनहुँ १ का अग्रज तथा युवाहरूको आफूलाई दरिलो साथ रहेको भन्दै चुनाव जितिनेमा प्रष्ट रहेकाे बताएका छन् ।
उनले कुरा गर्दै भने, ‘तनहुँ १ का अग्रज तथा युवाको सोचेभन्दा राम्रो साथ पाएको छु । मलाई चुनाव जित्न कुनै समस्या छैन । मज्जाले जितिन्छ । यहाँका जनताले तपाईँलाई निर्वाचित गराउने जिम्मा हाम्रो हो । विजयी भएर काम गर्नुपर्छ भन्नुभएकाे छ ।’
उनले आफ्नाे विषयमा यहाँका युवा पुस्ता जानकार रहेकाे र उनीहरूले आफ्ना अभिभावकलाई जानकारी गराइरहेकाे पनि बताए ।
‘मैले मेराेबारे यहाँका मतदातालाई धेरै कुरा भनिरहनु पर्दैन,’ उनले भने, ‘मेरो विषयमा यहाँका जनताले बुझ्नु भएको छ । मैले त केही बोल्नु नै परेको छैन । घरमा भएका युवा साथीहरूले आफ्ना अभिभावकलाई मेरो विषयमा बताइसक्नु भएको हुँदो रहेछ । सबै जनताको आकर्षण छ । हाम्रो पार्टी र मप्रति जनता असाध्यै पोजेटिभ भएको पाएको छु । जनताले फोन गरेर आफैँ पनि भेट्न आउभएकाे छ ।’








































