नेपाली कांग्रेसले सत्ता गठबन्धनबाट ८ मन्त्रालय पाउँदैछ । इतर समूहले ३ मन्त्रालयको दाबी गरेको छ । बिहीबारको कार्यसम्पादन समिति बैठकलगत्तै शेखर कोइरालाको कार्यकक्षमा इतर समूहको बैठक बस्यो । बैठकले तीन मन्त्रालयको अडान कायम राख्ने र सभापति शेरबहादुर देउवासँग वार्ता गर्ने निर्णय गर्यो ।
इतर समूहबाट उपसभापति धनराज गुरुङ र सांसद डिकबहादुर लिम्बु मन्त्री बन्ने सूचीमा छन् । कांग्रेस महामन्त्रीद्वय विश्वप्रकाश शर्मा र गगन थापाले सांसद प्रदीप पौडेललाई मन्त्री बनाउन चाहेका छन् ।
‘दुई वटा मन्त्रालय पाउने तय भैसकेको छ । तेस्रो मन्त्रालय पाउन सभापतिसँग छलफल गर्छौं,’ बैठकपछि एक पदाधिकारीले शिलापत्रसँग भने । सभापति देउवासँग शेखर कोइराला र महामन्त्री थापासँग पालैपालो वान टू वान छलफल गर्ने तयारी थियो । तर इतर समूहको बैठक लामो समय चलेपछि देउवा धुम्बाराही हानिए । देउवासँग कोइराला र थापाले वान टू वान भेट गर्नेछन् ।
कांग्रेसबाट एनपी साउद, सीता गुरुङ, डिगबहादुर लिम्बू, रमेश रिजाल, बद्री पाण्डे, प्रकाशशरण महत, पूर्णबहादुर खड्का, धनराज गुरुङ, विनोद चौधरी, किसोरसिंह राठौरको नाम अन्तिम सूचीको लागि तयार छ ।
कोशी प्रदेशबाट गुरुङ र लिम्बु, लुम्बिनी प्रदेशबाट राठौर र चौधरी तथा सुदूरपश्चिमबाट पाण्डे र साउदमध्ये को हुने् भन्ने निर्णय हुन बाँकी छ । तीमध्ये लम्बिनीबाट चौधरी र सुदूरपश्चिमबाट पाण्डे आउट हुने सम्भावना छ ।
तीमध्ये कांग्रसको भागमा परेको परराष्ट्र मन्त्रालय कसले सम्हाल्ने भन्ने तय भैसकेको छैन । ‘परराष्ट्र सम्हाल्ने व्यक्ति नै छैनन् । यी नामबाहेक अरु नाम पनि परराष्ट्रको लागि आउन सक्छ,’ ती पदाधिकारीले भने ।








































