काठमाडौं, चैत १३ गते । नेपाल बंगलादेशमा जारी साफ यू-१७ महिला च्याम्पियनसिप फुटबल प्रतियोगिताको तेस्रो खेलमा रुससँग पराजित भएको छ ।
ढाकामा आइतबार राति भएको खेलमा नेपाल रुससँग ३–० गोलले पराजित भयो । पहिलो हाफमा औसत प्रदर्शन गरेको नेपालले दोस्रो हाफमा तीन गोल खाएको थियो । रुसका लागि एलिना गोकिलले ६३औं र ७४औं मिनेटमा दुई गोल गर्नुभयो ।
पोलिनाले ८३औं मिनेटमा गोल गर्दै रुसलाई सजिलै जिताउनुभयो । पाहुना टोलीको रुपमा सहभागी रुसको यो लगातार तेस्रो जित हो । जितसँगै रुसले नौ अंक बनाएको छ । तीन खेलमा दोस्रो हार खेपेको नेपालको तीन अंक छ ।
प्रतियोगितामा आयोजक बंगलादेशसहित नेपाल, भारत, भुटान र रुसको सहभागिता रहेको छ । राउन्ड रोविन लिगको शीर्ष टोलीले उपाधि जित्नेछ । नेपालले आफ्नो चौथो खेल मंगलबार बंगलादेशसँग खेल्नेछ ।








































