काठमाडौं । राजधानी काठमाडौंको फोहोर बोकेर ओखरपौवा चल्ने गाडीहरुका लागि ‘टाइमकार्ड’ लागू गरिएको छ । स्थानीयको माग र दबाबपछि काठमाडौं उपत्यका ट्राफिक प्रहरी कार्यालय र काठमाडौं महानगरपालिकाले तोकिएको गतिमा मात्रै गाडी चलाउने व्यवस्था लागू गरिएको हो ।
अब मुडुखु नाकाबाट तीनपिप्ले हुँदै ओखरपौवा चल्ने फोहोरका गाडीहरु २० देखि ३० किलोमिटर प्रतिघण्टाको गतिमा चल्नुपर्नेछ । मुड्खुदेखि तीनपिप्लेसम्मको सडकखण्डमा प्रतिघण्टा ३० किलोमिटरको गतिले र तीनपिप्लेदेखि ओखरपौवा चेकपोष्टसम्मको सडकखण्डमा प्रतिघण्टा २० किलोमिटरको गतिले गाडी चलाउनुपर्नेछ ।
- ADVERTISEMENT -
फोहोरका गाडीहरु अराजक ढंगले दौडाउने गर्दा स्थानीयले आफूहरु असुरक्षित महशुस गर्नुका साथै सवारी दुर्घटनाको जोखिम समेत बढेको थियो । सो खण्डमा फोहोरका गाडी चलाउने ग्राहकलाई टाइम कार्ड दिइने र तोकिएको गति र समयभित्र गाडी नचलाएर कारवाही गरिने ककनी– १ कागतीगाउँस्थित प्रहरी चौकीका प्रहरीले जानकारी दिए ।
