स्याङ्जा।
नेपाली कांग्रेसका उपसभापति तथा सांसद धनराज गुरुङ्गले स्याङ्जा गल्याङ नगरपालिका वडा नं १ मालुङ्गा मा “कालीगण्डकी योग तथा प्राकृतिक अस्पताल” भवन बिहिबार शिलान्यास गरेका छन् ।


गल्याङ नगरपालिका वडा नं १मालुङ्गा उत्तरबाहिनीमा स्थापना हुने योग तथा प्राकृतिक अस्पतालको भवन गल्यांङ नगरपालिकाको वार्षिक बजेट अन्तर्गत विशेष अनुदान र सङ्घीय सरकारको २ करोड ११ लाखको लागतमा निर्माण सम्पन्न हुने अस्पताल निर्माण समितिका अध्यक्ष शालिकराम बस्यालले जानकारी दिए। उक्त अस्पतालले प्राकृतिक चिकित्सा सेवा प्रदान गर्ने र त्यसमा योग, ध्यान, व्यायाम लगायत सेवा सञ्चालन गरिने छ । कार्यक्रममा विशिष्ट अतिथिको रुपमा गण्डकी प्रदेश सभा सदस्य महेश भट्टराई र गल्याङ नगरपालिका प्रमुख गुरु प्रसाद भट्टराइको उपस्थिति रहेको थियो। त्यसैगरी वडा अध्यक्षहरु, राजनीतिक दलका प्रतिनिधिहरु, संघ संस्थाका प्रतिनिधिहरु,धार्मिक व्यक्तित्वहरु, पत्रकाहरु र स्थानीयहरुको बाक्लो सहभागिता रहेको थियो।


सो अवसरमा सांसद गुरुङले चिकित्सा केन्द्रका लागि सरकारका तर्फबाट आवश्यक सहयोगको लागि पहल गराउने बताए । मानिसका खानपान तथा आहारबिहार अस्तव्यस्त हुँदै गएको भन्दै गुरुङले पूर्वीय संस्कृतिको महत्त्व अत्याधिक रहेको बताए । कालीगण्डकी ज्ञान विज्ञान प्रतिष्ठानका अध्यक्ष तथा धार्मिक अभियन्ता चैतन्य कृष्णले सबैको सहयोग र सहकार्यमा अस्पताल निर्माण सम्पन्न गरिने बताएका छन्। गण्डकी प्रदेश सभा सदस्य भट्टराईले अस्पतालको निर्माण र सञ्चालनका लागि आफूले प्रदेश सरकार बाट सक्ने सहजीकरण गर्ने प्रतिबद्धता व्यक्त गरेका छन्। गल्याङ नगरप्रमुख गुरु प्रसाद भट्टराइले योग तथा प्राकृतिक चिकित्सा अस्पतालले उत्तरबाहिनीको गरिमा बढेको र मानिसलाई स्वस्थ र तन्दुरुस्त हुनेमा टेवा पुग्ने बताएका हुन्। कार्यक्रमको सभापतित्व भने कालीगण्डकी प्राकृतिक अस्पतालका अध्यक्ष शालिकराम बस्यालले गरेका थिए।


प्राकृतिक चिकित्सा, यो एउटा यस्तो अनौठो प्रणाली हो जसमा जीवनको शारीरिक, मानसिक, नैतिक र आध्यात्मिक विषयलाई रचनात्मक सिद्धान्तहरूसँग व्यक्तिका सद्भावको निर्माण हुन्छ। यसमा स्वास्थ्यलाई प्रोत्साहन, रोग निवारण र उपचारका साथ-साथै फेरि मजबूती प्रदान प्रदान गर्ने अपार सम्भावना हुन्छ।










































